SAN JUAN, Ilocos Sur – Dati a susik ti maitudtudo a ramut ti pammaltog a napasamak iti Barangay Bannuar ditoy nga ili idi rabii ti Disiembre 27.
Nainaganan dagiti biktima a da Joselito Briones y Palado, 54, ken ti asawana a ni Lorna Briones y Rapin, 53, idinto a maysa a Romeo Collado, Jr. residente iti Barangay Tamurong, Sta. Catalina, ti suspek.
Iti inisial a panagimbestiga dagiti polis, madama a mangrabii dagiti agassawa iti terasa ti balayda idi kellaat a nagparang ni Collado sana pinaltogan ida.
Naitaray dagiti biktima iti Pira Hospital, Cabugao ngem naideklara ni Joselito a dead on arrival gapu kadagiti grabe a sugatna. Nagsagrap met ni Lorna iti sugat iti makannawan a sakana.
Naglibas ti suspek iti saan nga ammo a direksion kalpasan ti pammaltog.
Nangiwayat dagiti polis-San Juan iti pursuit operation maikontra iti suspek ngem negatibo ti resultana.
Naaramat iti pammaltog ti Cal. 45 kas maibatay kadagiti dua a kapsula a narekobre iti nakapasamakan ti krimen.
Agtultuloy ti panagimbestiga dagiti polis mainaig iti nasao a pammaltog. (Tawid News Team)