Footer

Agkurang iti mangisursuro ti Cervantes – Dir. Miguel

CERVANTES, Ilocos Sur – Inannugot ti Department of Education regional director ti Region I nga agkurkurang iti mangisursuro dagiti pagadalan ditoy idinto nga innayonna nga  adda pay laeng 6 a mangisursuro iti elementaria ken 5 iti sekundaria a supsuportaran ti local school board ti ili.

Nupay kasta, inkari ni Dr. Ligaya R. Miguel nga apaman nga adda teachers’ item para iti Ilocos Sur, prioridad a maikkan daytoy nga ili tapno masulnitan dagiti pagkuranganna a mangisursuro.

Da Miguel ken ni Gov. Deogracias Victor Savellano dagiti kangrunaan a sangaili bayat ti Education Day a paset ti panagpiesta daytoy nga ili itay Abril 1.

Indagadag pay ni Miguel kadagiti mangisursuro ditoy nga ili a bisitaenda dagiti amin a balbalay ita a summer vacation tapno allukoyenda nga agbasa dagiti ubbing nga agtawen manipud iti 6 agingga iti 16 tapno ngumato ti enrolment ken maksayan ti dropouts kadagiti pagadalan.

“Inanamaek met ti tulong dagiti kameng ti Parent Teachers and Community Association, barangay officials ken dagiti nagannak itoy a programa. Rumbeng unay nga amin dagiti annaktayo ket adda iti pagadalan,” kinuna ni Miguel.

Dinawat pay  ni Miguel nga ipakaammo dagiti mangisursuro ditoy dagiti masapulda a repairs, libro ken computer sets babaen ken ni OIC Schools Division Superintendent Marino Baytec tapno maaksionan dagitoy a madagdagus apaman a rummuar ti pondo.

Kabayatanna, inallukoy  ni Gov. Deogracias Victor Savellano dagiti mangisursuro a suportaranda dagiti back to basic programs ti probinsia  babaen ti panangisuroda dagitoy iti amin a pagadalan.

“Napateg dagitoy a programa itoy a panawen a rumigrigat ti panagbiag, isu a papigsaentayo koma ti backyard gardening iti pagadalan,” kinuna ni Savellano.

Innayon pay ti gobernador a kasapulan unay a taginayonen dagiti taga-Cervantes dagiti kannawidanda a sala kas iti tadek.

“Saan a rumbeng nga ibain dagitoy a kannawidan ken saan a rumbeng a pukawen. No aniaman ti maitulong ti gobierno probinsial iti pannakatagiben ti kultura madadaan nga ipaay dayta ti administrasionko” impatalged ti gobernador.#