Aglaklako iti karne ti baboy, apektado gapu iti swine flu virus

BAGUIO CITY – Apektado dagiti aglaklako iti karne ti baboy ditoy siudad gapu iti panagamak dagiti aggatgatang iti swine flu virus.

Maysa a tindera a dina kayat ti painagan ti nagkuna a bimmaba ti paglakuanda iti karne ti baboy manipud idi bimtak ti damag maipapan ti panagraira ti swine flu virus iti Mexico.

Kinunana nga iti baet a nagdalan dagiti lakoda a karne ti baboy iti inspeksion, adu nga umili ti nagsardeng nga aggatang agsipud iti amakda a maakaranda iti nasao a sakit nga agtaud iti baboy.

Kabayatanna, aganay a 120 kilos ti karne ti baboy a naggapu iti Estados Unidos ti nakumpiska bayat a mailaklako iti tiendaan publiko ditoy itay nabiit.

Kinuna ti maysa nga opisial ti National Meat Inspection Service a kinumpiskada dagiti nasao a karne ti baboy a naggapu iti Estados Unidos tapno masigurado a saan a kuntaminado iti swine flu virus dagiti mailako iti public market ditoy siudad.

Nupay kasta, inannugot ti NMIS a naangkat dagiti nadakamat a karne ti baboy sakbay a naipatungpal ti pork ban iti Estados Unidos gapu iti pannakaduktal iti kaaddan dagiti nagsakit iti swine flu virus iti nasao a pagilian.

Imbilin ti lokal a gobierno ditoy ti naing-inget nga inspeksion kadagiti karne a mailako iti tiendaan publiko ken dagiti maiserrek iti siudad a sibibiag a baboy a tapno saan a makastrek ti swine flue ditoy.

Ditoy Ilocos Sur, impatalged ti veterinary office nga awan pay ti kaso a natakuatan ditoy probinsia mainaig iti swine flu virus.

Nupay kasta, kinuna ni Dr. Jerry Warren Bragado, provincial veterinarian a maipakat ti naing-inget a panagbantay iti quarantine checkpoint tapno masigurado nga awan ti sakit dagiti baboy a maiserrek iti probinsia.

Agdagupen iti 236 ti bilang dagiti kumpirmado a natay iti swine flu virus, segun iti World Health Organization.

Iti pannakaisurat daytoy, addan 109 a kumpirmado a kaso ti swine flu iti Estados Unidos, kangatuan ti bilang ti New York nga addaanen iti kaso a 50.#