Agtuturay ti simbaan, nalalatak a negosiante, politiko ti nangbusat iti Vigan river cruise

VIGAN CITY – Dagiti nangato nga agtuturay ti Simbaan Katoliko ken nalalatak a politiko ken negosiante dagiti immuna a pasahero iti panaglukat ti river cruise project ti city government iti Barangay Beddeng Laud ditoy itay Mayo 1.

Malaksid kadagiti city officials nga indauluan ni Mayor Eva Marie S. Medina, karaman dagiti immuna a pasahero da Archbishop ti Nueva Segovia Ernesto Salgado, Rev. Fr. Gary Formoso, Gov. Deogracias Victor Savellano, Vice Gov. Jeremias Singson, Mayor ti Sta. Catalina Carlos Asuncion, dati a Rep. ti Hawaii Felipe “Jun” Abinsay, Jr., dati a konsehal ti Vigan ken akinkukua iti JTC Mall Steve Javier, Dr. Esperanza Lahoz ti McDonald, ken dadduma pay a dadakkel a negosiante, mangisursuro ken sumagmamano a kameng ti media iti probinsia.

Prioridad a programa ti city government ti river cruise a nairanta a pagpallailangan dagiti sangaili, turista ken uray dagiti agindeg ken kas pangitandudo iti nabaknang a kultura ken historia daytoy naprogreso a siudad.

Lima nga estasion ti naipattopattok iti river cruise a nakaitampokan ti isasanglad ni Juan de Salcedo iti Vigan; pannakaiyalis ti tugaw ti Arkidioses ti Nueva Segovia manipud Lallo, Cagayan iti Vigan; dagiti tradisional nga industria kas iti panagpanday, panagabel, panagaramid iti burnay ken panagkurti wenno panagaramid iti lalat nga aramiden a sinelas wenno sapatos; dagiti tradisional a makan a kas iti empanada, langgonisa ken dadduma pay a delicacy; ken ti pre-colonial period a pakabuyaan iti panagimaro wenno barter trade sakbay ti yaay dagiti Kastila iti Vigan.

Iti Celedonia iti Barangay Beddeng Laud a kukua da Barangay Captain Edgar Pajaro ti pagrubbuatan ken pagdissaagan iti aganay maysa nga oras a panagpallailang iti karayan Mestizo a biniag ti city government babaen ti dredging operations.

Agbayad dagiti pasahero iti P100 ti regular rate para adults iti river cruise ngem no taga-Vigan ti aglugan iti bangka, maikkan iti special discount ket agbayad laeng iti P70.00.

Maikkan met iti special rate a P60 dagiti estudiante ken ubbing idinto a P70.00 kadagiti senior citizens.

Inikkan ti sangguniang panlungsod ni Mayor Eva Marie S. Medina iti otoridad a mangingato, mangipababa wenno mangi-waive iti fare rate depende iti exigency iti serbisio wenno situasion.#