Asawa ti biktima ti pammaltog, saanen nga interesado a maituloy kaso gapu iti security reasons

STO. DOMINGO, Ilocos Sur – Sabali pay a kaso ti pammaltog ditoy probinsia ti maisardengen ti pannakaimbestigana gapu ta saanen nga interesado ti pamilia ti biktima.

Iti kaudian a report manipud iti polis ditoy, nagpirma ni Lorelyn Villegas y Bartolome iti apidabit idi pay la Disiembre 29, 2016 a ninotarioan ni Atty. Virgilio V. Guzman a nangilanadanna a saanen nga interesado a maituloy pay ti inbestigasion ken prosekusion dagiti nangpapatay ken ni lakayna idi malem ti Hulio 31, 2016 gapu iti personal ken security reasons iti baet nga addan suspek ti kapolisan ditoy a nainaig iti nasao a krimen.

Maipalagip nga idi agarup 4:45 ti malem ti nadakamat a petsa, napapatay ni Alan Villegas y Solima iti sanguanan ti public market sadiay Barangay Vacunero ditoy nga ili.

Nupay saan a nabigbig ti/dagiti suspek a nanggudas ken ni Villegas, babaen ti agtultuloy a panagimbestiga ti kapolisan ditoy mainaig iti nasao a pammapatay, agparparang nga adda koneksion ti krimen ken maysa a drug personality a managan Begel Rosete.

Iti inpormasion a nakalap dagiti inbestigador, inan-anup ni Rosete ni Villegas gapu ta mapapati nga adda di nabayadan ti naud-udi iti illegal a droga a naalana ken ni Rosete.

Segun iti polis, karaman ni Rosete kadagiti nakategoria a pusher/user ken mapapati a gun for hire nga agop-operar iti Sinait ken kaarrubana nga ili.

Mapapati a masansan a makita ni Rosete iti balay ti maysa a Ray Arman Castro iti Barangay Poblacion. Maysa met a drug personality ni Castro ken biktima ti pammaltog a napasamak idi Hulio 9, 2016.

Nagudas met ni Rosete iti lehitimo a police operation sadiay Luna, Apayao idi Septiembre 2, 2016.

Kuna dagiti otoridad a gapu iti pannakapapatay ti suspek iti pannakapaltog ni Villegas ken iti panagpirma ti asawana iti affidavit of desistance, maibilangen a nakaserra ti kaso.#