Balay Taripato Annex, naluktan

CABUGAO, Ilocos Sur – Gapu iti pannakapunnon ti Balay Taripato iti Magsingal ken gapu iti umad-adu a dawat dagiti kaprobinsiaan, maysa a pay a home for the aged ti nailukat ditoy nga ili idi Nobiembre 24.

Masarakan ti Balay Taripato Annex iti sigud a klinika Azcueta iti Barangay Bonifacio ditoy ket ditoy ti pakataraknan dagiti abandonado a babbaket ken lallakay nga addaan iti kaya iti biag. Makalaon ti nasao a balay taripato iti 15.

Segun ken ni Gov. Deogracias Victor “DV” Savellano, maysa daytoy a wagas tapno masungbatan ti kalikagum dagiti pensionado a mayat a sumrek iti home for the aged.

Kinuna met ni Jose Pepito Zapata, Federated President ti Senior Citizens, a nupay adda kadatayo a Filipino ti panagtitipkel iti pamilia, saan a maaluadan nga adda dagiti mabaybay-an a nataengan isu a napintas unay ti pannakailukat ti nasao a balay taripato tapno ditoy a mataraken dagiti nakapimpiman a nataengan.

Kinuna ni Zapata nga idawatna iti mangidaulo iti senior citizens iti Rehion I a dawatenna ti P500,000 a pannakabagi ti Ilocos Sur nga inted ti Malacanang para iti Rehion I tapno itulongda iti home for the aged.

Impakaammo ni Provincial Social Welfare and Development Officer Ferdinand Concepcion a kumpleto ti agas, kanen ken addaan pay iti caregivers ken visiting doctors dagiti maawat nga aggian iti Balay Taripato Annex. No adda dagiti agbayad a sumrek, daytoy metten ti mangsupusop iti pagpakanda kadagiti indigents iti ward.

Inkari met ni Mayor Dio Caesar S. Suero ti libre a panangipaay ti Suero General Hospital iti libre a medical consultation ken pannakausar dagiti pasilidad ti ospitalna para kadagiti adda iti Balay Taripato Annex.#