Balay Taripato, inadaptar ti Ilocos Sur Medical Society

VIGAN CITY – Maysa a memorandum of agreement ti nagpinnirmaan ti gobierno probinsial ken ti Ilocos Sur Medical Society itay Septiembre 27 para iti panangadaptar ti gunglo iti balay a pakataripatuan dagiti babbaket ken lallakay ditoy probinsia.

Naisayangkat ti MOA signing iti nagbaetan da Gov. Deogracias Victor “DV” Savellano a nangibagi iti provincial government ken ni Dr. Gloria Lahoz, presidente ken nangibagi iti ISMS ken sinaksian da Sangguniang Panlalawigan Member Gerry Lahoz ken ni Philippine Medical Society Governor for Northwestern Luzon Dr. Digna Ragasa, kas paset ti pannakaselebrar ti Medical Week.

Sagudayen ti MOA nga adaptaren ti ISMS ti Balay Taripato, ti pasdek a pakataraknan dagiti lallakay ken babbaket a tartarawidwidan ti gobierno probinsial iti ili a Magsingal ket binulan ti ibibisita ti asosasion dagiti doktor iti Balay Taripato tapno mangipaayda iti libre a medical services kadagiti nataengan a maay-aywanan ditoy. Paset met ti gobierno probinsial ti panangipaayna kadagiti kasapulan dagiti doktor iti panagserbida kadagiti nasao a pasiente.

Inyawat ni Savellano ti tseke nga aggatad iti P85,000 iti gunglo nga agpaay para iti pannakagatang iti agduduma a medical supplies.

Iti panagsarita ni Lahoz, imbinsabinsana dagiti gapuanan ti gunglo iti napalabas a makatawen nagtugaw a presidente kas iti pannakapirma ti MOA iti nagbaetan ti gobierno probinsial ken ISMS a pannakaiparit ti panagsigarilio kadagiti pampubliko a lugar, ti aktibo a pannakitinnulong ti gunglo iti Kakailian nga Agnaed iti Barangay Sangsangkamaysa nga Agrang-ay Tayo (KABSAT) Outreach program, ti Text Brigade ken ti panagkinnammayet ti ISMS ken gobierno probinsial iti pannakaisayangkat iti binulan a medical mission ken libre a lay forum iti kapitolio.

Nagsapata pay iti daytoy a gundaway dagiti baro nga opisial ken kameng ti gunglo.#