SAN ILDEFONSO, Ilocos Sur – Dua manen a drug personalities ti pinapatay dagiti armado a tattao a riding in tandem idi Disiembre 17 sadiay Barangay Bahet, ditoy nga ili ken Barangay Balaleng Purok, Bantay, Ilocos Sur.
Immuna a naireport idi agarup 8:25 ti bigat iti daytoy a petsa a napaltogan ni Patrocinio Alonzo Jr. y Pagador, 58, baro, ken residente iti Barangay Balaleng Purok, Bantay, Ilocos Sur a puon ti nakatayanna.
Kas maibatay iti report, agputputed ni Alonzo iti kawayan iti abagatanen nga abaga ti kalsada idi nagsardeng iti asidegna ti maysa a nangisit a motorsiklo nga awanan plaka a nagluganan ti dua a lalaki a nakahelmet, nakamaskara ken nakaaruat iti nangisit a diaket.
Dimsaag ti nagtugaw iti likud sana pinaltogan ni Alonzo iti sumagmamano a beses a nakatiruan ti nadumaduma a paset ti bagi daytoy.
Naglibas dagiti suspek iti laud a direksion ket nupay napakdaaran ken nangiwayat dagiti kabangibang a police stations iti dragnet operation, mapapati a nakalusoten dagiti suspek.
Intaray ti pamiliana ti biktima iti Gabriela Silang General Hospital, Vigan City ngem saanen a naiyabot pay a sibibiag.
Nakarekobre ti SOCO team a nakabase iti Police Provincial Office, Bulag, Bantay, Ilocos Sur iti nakapasamakan ti krimen, iti innem a kapsula manipud iti cal. 45 ket naipatulod dagitoy iti ISPCLO para iti ballistics examination.
Segun iti polis, karaman ni Alonzo iti drug watch list, high value target, level 2 ken miembro ti Piano Drug Group, kasta met a maysa kadagiti boluntario a drug surrenderer idi Hulio 12, 2016.
Iti maikadua a report, pinaltogan dagiti armado a tattao a nakalugan iti di nabigbig a motorsiklo ni Benedict Madriaga y Aguinir aka “BIKOY”, 30, naasawaan, agnegnegosio iti buy and sell iti baka ken residente iti Brgy. An-annam West, Bantay, Ilocos Sur idi agarup 2:40 ti malem ti nadakamat a petsa bayat a nakalugan iti Motoposh Pinoy a motorsiklona a nagsagrapanna kadagiti sugat iti nadumaduma a paset ti bagina.
Naitaray ti biktima iti Northside Doctors Hospital, Guimod, Bantay, Ilocos Sur ngem indeklara ti doktor nga awanen ti biagna.
Naglibas dagiti suspek iti amianan a direksion.
Pinakdaaran dagiti nagresponde a polis dagiti kabangibangda a police stations ngem negatibo ti resultana.
Iti panangproseso ti SOCO a nakabase iti Ilocos Sur Police Provincial Office, Bulag, Bantay iti crime scene, nakarekobreda iti uppat a kapsula manipud iti cal. 45 ken maysa a jacket bullet.
Segun iti polis, kameng ni Madriaga iti Piano Drug Group-High Value Target Level 2. (Tawid News Team).