BANNER: Gobierno probinsial nakasaganan a mangsangaili Miss Universe candidates iti Vigan City

VIGAN CITY – Nakasaganan dagiti agtuturay ti probinsia ti Ilocos Sur ken ti Siudad ti Vigan a mangsangaili kadagiti agarup 20 a kandidato para Miss Universer a bumisita ditoy siudad inton Enero 15.

Daytoy ti impatalged ni Provincial Tourism Officer Michael Ryan Astom idinto nga innayonna a naisayangkaten dagiti serye a panagmimiting dagiti maseknan nga opisina ken organisasion tapno mapinal dagiti detalye mainaig iti ibibisita dagiti kandidata para Miss Universe iti Vigan City.

Agtalinaed dagiti kandidata para Miss Universe iti Vigan City iti maysa laeng nga aldaw.

Malaksid ti Vigan City, bumisita pay dagiti kandidata sadiay Davao City, ili ni Presidente Rodrigo Duterte; Cagayan de Oro, ili ni Miss Universe Pia Wurtzback; Boracay ken Cebu; ken Palawan.

Kinuna ni Astom nga apaman a sumangpet dagiti kandidata iti Vigan airport sakbay ti lunch time, maideretsoda iti Hidden Garden’s Lilong and Lilang Restaurant para iti panangaldawda sadanto agturong iti Baluarte Zoo. Kalpasanna, agtsek-in dagiti kandidata iti Hotel Luna a pagsaganaanda para iti fashion show a maangay iti Vigan Heritage Village iti alas siete ti rabii.

Kinuna ni Astom a pakaidayawan ti Ilocos Sur ti pannakapili ti Siudad ti Vigan a maysa kadagiti tourist destination dagiti Miss Universe candidates idinto nga innayonna a dakkel ti impact daytoy a pagteng iti turismo iti probinsia ken iti siudad.

Kinuna pay ni Astom a maysa a historia ti panagpasiar dagiti kandidata iti Vigan City sana inyunay-unay kadagiti kaprobinsiaanna ti yaayda panagbuya agsipud ta daytoy ti kaunaan a pagteng a mapasamak iti probinsia ti Ilocos Sur.

“It is our honor to have the Miss Universe candidates in Vigan City, Ilocos Sur. In-invite ko po lahat to come and witness the very first time na mangyayari sa probinsya natin. All set na sa pag-welcome sa mga kandidata ng Miss Universe,” kinuna ni Astom.

Nupay kasta, daytoy ti maikatlo a gundaway nga ag-host ti Pilipinas iti Miss Universe pageant.

Immuna idi Hulio 21, 1974 ket naangay ti pageant iti Folk Arts Theater iti Manila.

Iti daytoy a pagteng, inyallatiw ni 1973 Miss Universe Margie Moran ti korona ken ni Amparo Muñoz, Miss Spain.

Maikadua idi 1994 no sadino a nakoronaan ni Sushmita Sen, Miss India, kas Miss Universe.

Ita a tawen, iyallawat ni Miss Universe Pia Wurtzback ti korona iti mangabak.

Ni Maxine Medina ti kandidata ti Pilipinas para iti daytoy prestihioso nga internasional a pasalip iti kinapintas.

Kabayatanna, kinuna ti maysa nga opisial ti Ilocos Sur Police Provincial Office a nakasagadan a mangtagipen iti urnos ken talna kabayatan ti kaadda dagiti kandidata iti Vigan City.

Segun ken ni Police Community Relations chief, Police Chief Inspector William Nerona nga agarup 1,000 a polis ken soldado ti maideploy kadagiti lugar a pakaangayan kadagiti aktibidad.

Magagamit natin sila sa route security kung saan gaganapin ang mga events, yong iba mga augmentation natin, kabilang ng mga miyembro ng Explosives Ordnance Division, may mga K-19 na manggagaling sa iba’t ibang probinsya at mga Aviation Security na tututok sa Airport (Maaramattayo ida kas seguridad iti rota kadagiti lugar a pakaaramidan dagiti pagteng, dagiti dadduma, augmentation kas dagiti miembro ti Explosive Ordnance Division, adda pay K-19 nga aggapu kadagiti sabsabali a probinsia ken ti Aviation Security a maipuesto iti airport),” kinuna ni Nerona.

Kanaig daytoy, kiniddaw dagiti agtuturay ti probinsia nga idadauluan ni Governor Ryan Singson ken ti Siudad ti Vigan nga idadauluan ni Mayor Juan Carlo S. Medina ti pannakipartisipar ti amin para iti panagballigi dagiti nasao nga aktibidad iti Vigan City.

Inggunamgunam pay dagiti agtuturay iti publiko ti panangsurotda iti kondision nga intuyang dagiti organizers kas iti “no selfie rule”.

Kinuna dagiti opisial ti gobierno probinsial nga iti ipapasiar dagiti kandidata para Miss Universe iti Vigan City, ad-adda manen a dumur-as ti turismo ken umad-adu dagiti turista nga agpasiar iti Vigan City ken iti probinsia.

Madakamat ditoy a nakalista ti Vigan City a kas UNESCO World Heritage Site ken napili a maysa kadagiti 7NewWonders Cities of the World. (Tawid News Team)