BANNER: Gun ban, naipakat bayat kaadda Miss Universe candidates iti Vigan City

VIGAN CITY – Naipakat ti gun ban iti sibubukel a Metro Vigan manipud Enero 13-16 tapno masiguro ti seguridad dagiti kandidata para Miss Universe ken iti publiko, daytoy ti inwaragawag ti Ilocos Sur Police Provincial Office bayat ti press conference a naangay iti city hall ditoy idi Enero 10.

Kinuna ni Provincial Director Senior Supt. Rey de Peralta a naiyimplementar ti gun ban kas paset ti plano ti seguridad dagiti kandidata iti Miss Universe bayat ti kaaddada iti Vigan City inton Enero 15.

Kinuna ni de Peralta a 1,000 a polis ti naideploy iti Vigan City a mangtagiben iti urnos ken talna bayat ti kaadda dagiti Miss Universe candidates iti siudad.

Segun iti provincial director, 856 ti naggapu iti Ilocos Sur PNP, 80 manipud iti Police Regional Office, idinto a sumagmamano ti naggapu iti Maritime Unit ken dadduma pay nga opisina ti PNP.

Malaksid itoy, naideploy pay dagiti kameng ti Barangay Peacekeeping Action Teams (BPAT) manipud iti 39 barangays ti siudad.

Kanaig daytoy, kinuna ni de Peralta a dagiti laeng nakauniporme a PNP ken personnel ti Armed Forces of the Philippines ken dagiti nakabarong a polis nga agpaay nga eskort tunggal kandidata dagiti otorisado nga agimet iti paltog bayat iti nasao a pagteng.

Kabayatanna, pinirmaan ni Vigan City Mayor Carlo Medina ti maysa nga executive order a mangiparit iti panaginom, panaglako ken panaggatang iti alcoholic beverages manipud Enero 14-16 kas paset ti maipakat a seguridad dagiti kandidata ti Miss Universe bayat ti kaaddada iti Vigan City.

Naikiddaw pay iti publiko ti saanda a panagaruat iti kallugong, panagikuyog iti back pack, naibotelia a mainom, natirad a bambanag, ken arak bayat ti pannakaangay ti fashion show iti Plaza Burgos iti karabian ti Enero 15.

Nakaserra met dagiti pagimpanadaan iti Plaza Burgos ket nupay nakalukat dagiti souvenir shops iti Crisologo Street, saanda nga aglako kadagiti kustomer. Nupay napalubosan a nakalukat dagiti restaurant, panganan ken grocery stores, ngem saan a mabalin nga agikuyog dagiti kustomer iti ginatangda iti pakaaramidan ti fashion show.

Inyunay-unay ni de Peralta a maysa nga internasional a pagteng ti ibibisita dagiti kandidata para Miss Universe iti Vigan City ket agbalin a negatibo a marka ti World Heritage City aniaman a dakes a mapagteng ditoy agsipud ta mabuya ti sangalubongan.  (Tawid News)