BANNER NEWS: 2 dadaulo nga NPA, simmuko

CANDON CITY – Dua a dadaulo ti New People’s Army ti simmuko iti nagtipon a puersa ti Regional Special Operations Group (RSOG), Naval Intelligence and Security Group-Northern Luzon, Regional Mobile Group ken dagiti polis ditoy a siudad iti Barangay San Juan iti malem ti Hulio 20, 2009.

Innaganan ni Police Chief Inspector Julius Suriben, hepe ti RSOG ti Police Regional Office 1 dagiti simmuko a da Samuel Compalas, 53, alias “Dawing”, lider ti Party Group (PG) Polaris Team 2 ti Kilusang Larangang Gerilia (KLG) de Lara ken ni Dominador Angdos, 47, assistant team leader ti PG Venus ken agpada a kameng ti NPA Ilocos-Cordillera regional Committee (ICRC).

Kinuna ni Police Chief Supt. Ramon Gatan, regional director, a sumangsango dagiti dua iti kaso a murder ket adda standing warrant of arrest nga impaulog ni Judge Gabino Balbin, Jr. ti Regional Trial Court Branch 23 ditoy siudad.

Segun ken ni Gatan, sumangsango pay ni Compalas iti sabali a kaso ti murder ken panagtakaw a naipila met laeng iti nasao a korte.

Kinuna ni Gatan a ti isusuko dagiti dua ti pammaneknek iti napabileg a kampaniada maikontra iti insurhensia iti Ilocos Region ken pannakadismaya dagiti simmuko iti kinarigat ti biagda iti kabambantayan.#