Footer

BANNER NEWS: 2017 RIAA Meet, pormal a naluktan; 9,000 atleta agsasalip iti 6-aldaw a paay-ayam

BANTAY, Ilocos Sur – Pormal a naglukat ti Region I Athletic Association Meet babaen ti maysa a seremonia a naangay iti Presidente Elpidio Quirino Stadium ditoy nga ili idi malem ti Marso 4.

Sakbayna, aganay 9,000 nga atleta manipud iti lima a siudad ken siam a probinsia iti Region 1 ti nakipartisipar iti parada a nagtunged iti nasao nga estadium tapno imatanganda ti pormal a panaglukat daytoy innem nga aldaw a paay-ayam ti sports a pagsangailian ti probinsia ti Ilocos Sur.

Timmabuno iti programa dagiti agtuturay iti probinsia a pakaibilangan ni Vice Governor Jeremias “Jerry” Singson, dagiti opisial ti DepEd Region I, dadaulo dagiti delegasion.

Sakbayna, impatalged ni Ilocos Sur Provincial Director Senior Superintendent Rey De Peralta a nakasaganan ti kapolisan a mangiwayat iti naing-inget a seguridad tapno masigurado ti natalna a panagsasalip dagiti atleta iti Region I Athletic Association (RIAA) meet.

Nakaalerto ti kapolisantayo para iti naituding nga innem nga aldaw a torneo tapno sigurado a natalna ti pannakaisayangkat ti RIAA Meet ken nakaradkad nga aggawid dagiti atleta iti lugarda kalpasan ti paay-ayam,” kinuna ni De Peralta.

Iti immun-una nga interbio ni Governor Ryan Luis V. Singson iti lokal a media, kinunana a nakasaganan ti baro nga “state-of-the art” President Elpidio Quirino Stadium a pakaangayan ti RIAA ken uray pay iti Palarong Pambansa a manamnama a maangay ditoy probinsia inton 2018.

Kinuna pay ni Singson a nagapela ti probinsia iti Department of Education a ditoy probinsia ti pakaangayan ti Palarong Pambansa kas paset ti panangselebrar iti Maika-200 nga Anibersario ti panagwayas ti Ilocos Sur a kas probinsia.

Idi Hulio idi napan a tawen, kas pamadasan iti kinasagana ti stadium, nagay-ayam payen iti football field ti stadium ti Philippine Azkals ken ti Australian Perth. Addaan pay ti stadium iti swimming pool a makapatar iti Olympic standard size.

Lima a probinsia a pakaibilangan ti Ilocos Norte, Ilocos Sur, La Union, Pangasinan I ken Pangasinan II, ken siam a siudad a pakairamanan ti Dagupan City, Laoag City, Urdaneta City, Alaminos City, Candon City, San Fernando City, Vigan City, Batac City, ken San Carlos City ti sangailien ti Ilocos Sur para iti innem nga aldaw a paay-ayam ti RIAA.

Kabayatanna, impasingked ni Marius Cabudol, sports coordinator ti probinsia, a 20 a pagadalan ti Vigan City, Bantay, Santa Catalina, San Vicente, at Santo Domingo ti naituding a pagdagusan dagiti nadumaduma a delegasion iti makalawas a paay-ayam.

Innayonna a nakasagana metten dagiti dadduma pay a lugar a pakaangayan ti paay-ayam.

Kinuna ni Cabudol a maay-ayam iti Quirino Stadium ti athletics, basketball (secondary ken elementary category), boxing, lawn tennis (second-ary), sepak takraw, swimming, volleyball (secondary), soccer ken goal ball.

Iti San Ildefonso Central School ken gym ti pakaay-ayaman ti archery ken arnis idinto nga iti Ilocos Sur Badminton Club iti Bantay ti pakaangayan ti badminton.

Maay-ayam kadagiti sabali pay a lugar iti probinsia ti baseball, billiards, chess, gymnastics, volleyball, wrestling, wushu ken dadduma pay nga sports.

Kinuna ni De Peralta nga adda dagiti naituding nga agbantay a polis kadagiti pagadalan a paggianan dagiti delegasion tapno masigurado ti karadkad dagiti atleta, coaches ken mangisursuro iti makalawas a paay-ayam. (Tawid News/Imelda C. Rivero, PIA 1, Ilocos Sur)