Footer

BANNER NEWS: Agtuturay a nakaturpos iti tallo nagsasaruno a termino, umawat iti public service award, cash incentive

VIGAN CITY – Umawat iti public service award nga adda karagpinna a cash incentive dagiti provincial officials a nakaungpot iti tallo a nagsasaruno a termino.

Sangsangkamaysa nga inaprobaran dagiti kameng ti sangguniang panlalawigan bayat ti sessionda itay Marso 3 ti ordinansa nga indatag ni Bokala Chuchi Purisima a pannakaited iti public service award kadagiti opisial ti probinsia a nakakumpleto iti tallo a nagsasaruno a termino manipud 1992, 1995, 1998, 2001 ken 2004.

Sagudayen ti ordinansa a malaksid iti sertipiko ti pammigbig, maikkan iti cash incentive nga aggatad iti sag-P1 milion ti gobernador ken ti bise gobernador, P750,000 kadagiti bokal ken P500,000 iti SK President ken ABC Federated President.

Ngem nagtudo dagiti text messages kadagiti radio stations idi maipadamag ti pannakaaprobar ti ordinansa a pannakaited ti nasao nga insentibo kadagiti provincial officials.

Segun iti maysa a texter, nasusuelduan dagiti opisial ket saan a rumbeng a maikkanda iti cash incentive iti panaggibus ti maikatlo a nagsasaruno a terminoda.

Iti sabali a text message, kinunana a nagkandidato dagitoy ken nagpapili nga agserbi, saan a tapno mabayadanda iti serbisioda kadagiti umili.

Ngem inkalintegan ni Bokala Purisima nga adda dagiti lokal a gobierno a pakairamanan ti siudad ti Candon ken Vigan City a nangipasa iti ordinansa a maikkan iti insentibodagiti opisialda a nakakumpleto iti tallo a nagsasaruno a termino.

Kinuna met ni Vice Gov. Jerry Singson iti interbio ni Jun Ramos kenkuana iti programana a Kakibin ti Balligi nga inadaptar ti provincial board ti inaramid dagiti opisial dagiti nadakamat a siudad a naikkan dagiti opisialda iti incentive pay.

Kinuna ni Singson nga awan ti bokal a nangkontra iti nasao a ordinansa ngem adda laeng malawlawagan iti linaon ti ordinansa mainaig kadagiti ex-officio members ti sangguniang panlalawigan agsipud ta adu kadakuada ti saan a nakaungpot iti tallo a nagsasaganad a termino.

Kinuna ni Purisima nga awan ti problema iti pannakapundo ti nasao nga ordinansa agsipud ta maysa a first class province ti Ilocos Sur ket adda pamastrekanna a pagtaudan iti pondo.

Innayon ni Singson a no “mapirmaan ti gobernador ti nasao nga ordinansa, agbalin a linteg ket awan ti rason a matiped” daytoy.#