BANNER NEWS: Amianan a Luzon, sinanotan ni Bagyo Pepeng

VIGAN CITY – Ginasut a residente nangruna dagiti agindeg kadagiti nababa a lugar ken coastal barangays ti nagbakuit gapu iti pannakalayusda iti panangsanot ni Bagyo Pepeng iti Amianan a Luzon a pakairamanan ti probinsia ti Ilocos Sur.

Iti pakpakauna a report manipud iti Provincial Disaster and Coordinating Council, nasuroken a 26,620 a pamilia iti 358 a barangay wenno iti kadagupan a 104,619 a tattao dagiti naapektaran iti panangduprak ni Bagyo Pepeng iti Amianan a Luzon manipud idi Oktubre 3 ken panagintekna iti Ilokos iti sumagmamano nga aldaw a nangibuyatanna iti bayakabak a nanglayus kadagiti kabalbalayan ken kataltalonan iti probinsia.

Agdagup metten iti 1,424 dagiti pagtaengan a partially damaged ken 141 a balbalay dagiti totally damaged, segun iti PDCC.

Kabayatanna, naireport a 500 a residente ti Poro, Magsingal ti nagbakuit iti ili ken iti People’s Coliseum iti Sto. Domingo gapu iti panagdinakkel ti danum iti barangayda.

Agdagup met iti 31 a pamilia wenno nasurok a 150 a tattao ti naibakuit manipud iti Sta. Catalina gapu iti layus.

Maysa ti naireport a natay a babai iti Sta. Maria, Ilocos Sur gapu iti pannakatnagna iti kanal manipud iti motorsiklo a minaneho ti asawana iti kanal.

Kabayatanna, rinibribu a pasahero ti nataktak iti panagbiaheda idi Oktubre 5 gapu iti panagkaruskos dagiti pitak ken bato manipud iti bantay iti Banaoang, Bantay, Ilocos Sur a nanggabor iti kalsada nasional.

Nupay kasta, naluktan met laeng ti trapiko iti kabigatanna kalpasan ti panagtitinnulong ti DPWH ken dagiti pribado a kontraktor nga addaan loader a nangiwalin kadagiti naibangen iti kalsada.

Kinuna ti maysa nga opisial ti DPWH nga agtultuloy ti clearing iti nasao a kalsada agingga iti saan a mawaknitan ti agsumbangir a paset ti kalsada tapno makapagsinnabat dagiti lugan.

Segun iti PDCC, makalasat metten dagiti lugan nupay one-lane laeng ti kalsada iti Junction road iti Narvacan, iti Santiago-San Emilio road, Tagudin-Cervantes road ken iti Cervante-Quirino road.

Iti panangsanut ti Bagyo Pepeng iti probinsia itay Oktubre 4, nalayus ti Barangay Lapting ken Bacsil ket 5 a pamilia ti nagpakni iti munisipio ti San Juan.

Saan a dagus a naidanon dagiti relief goods iti Barangay Bucalag, Calungboyan ken Rancho iti Santa, Ilocos Sur gapu kapegges ti danum. Naidanon dagiti relief goods iti Barangay Uribi ken Dammay iti nasao met laeng nga ili babaen ti chopper nga insangpet ni Cong. Ronald Singson.

Pagatsiket ti danum iti sanguanan ti sanguanan ti Sinait National High School idinto a maysa a traysikel ti naiyanud iti Barangay Gongogong, San Ildefonso, Ilocos Sur gapu iti napegges a danum a limmasat iti kalsada nasional.

Saan pay a nabirokan ti barge para iti river cruise iti Barangay Bantaoay daytoy nga ili ket mapapati a limneden.

Iti met Cabugao, maysa a barko ti naipadamag a naisadsad gapu kadagiti dadakkel a dalluyon.#