Footer

BANNER NEWS: Chavit, imparipiripna panagkandidatona manen

CANDON CITY – Dakkel ti posibilidad ti panagsubli ni Deputy National Security Adviser Luis “Chavit” Singson a kas gobernador iti probinsia.

Daytoy ti paripirip ti dati a gobernador iti panagbitlana iti panagkasangay ni House Deputy Speaker Eric Singson a naangay iti Stern Mall, Candon City itay Hunio 15.

Dimmar-ay iti kasangay ti diputado dagiti nangangato nga agtuturay a pakairamanan da National Defense Secretary Gilberto Teodoro, Deputy National Security Adviser Luis “Chavit” Singson, Arsobispo Ernesto Salgado ken dagiti papadi ti Nueva Segovia, da Party-list Representative Jose Ping-ay ti COOP-Natcco ken Pacoy Ortega ti Abono, Cong. Solomon Chungalaw ti Ifugao, Gobernador DV Savellano, Gobernador Takits Bersamin ti Abra, ken dadduma pay nga agtuturay iti probinsia, munisipalidad ken barangay iti maikadua a distrito ti probinsia.

Iti panangkablaawna ken ni Gov. Deogracias Victor Savellano, maysa kadagiti bisita ti diputado a mangibagi iti maikadua a distrito, inyangaw ni Singson ti panangsublatna iti puesto ni Savellano.

“Kasaritakto ita…bareng ipasublatna…,” kinuna ti dati a gobernador sana innayon nga “agsasaritakaminto pay kada Gobernador DV….”

Maipalagip a ni Savellano ti intandudo ni Singson idi nagturpos ti tallo a terminona a kas gobernador ket nagtaray a para senador iti babaen ti partido ti administrasion ngem naabak.

Kalpasan ti makatawen, dinutokan ni Pres. Gloria Arroyo ni Singson kas Deputy National Security adviser.

Kinuna ni Singson nga iti panagsublina iti probinsia, di pay siguro ti pagtarayanna.

“Agsubliak iti probinsia, ngem diak pay ammo ti pagtarayak, no mayor wenno konsehal…” inyangaw ni Singson.

Kabayatanna, masipsiputan met no ania ti plano ni Cong. Singson iti sumaruno nga eleksion.

Agturpos ti maikatlo a termino ni Singson kas diputado iti maikadua a distrito inton 2010.#