BANNER NEWS: DA nangilatang iti P100-M para pagpabangon iti pugon

CANDON CITY – Adda maplanplansa a programa ti Department of Agriculture ken ti National Tobacco Administration a mangipaay iti tulong kadagiti mannalon nga agpabangon iti pugonda para iti sumaruno a panagtatabako, segun iti maysa nga opisial ti NTA ditoy.

Iti telephone interview ti Tawid News Magasin ken ni agdama nga officer-in-charge ti NTA-Candon branch Estrella de Peralta, kinunana nga adda advance nga impormasionda nga adda P100 million nga inlatang ti Departamento ti Agrikultura para iti pannakatulong kadagiti mannalon nga agpabangon wenno mangsimpa iti pugonda.

Kinuna ni de Peralta a mapautangan iti P100,000 ti mannalon nga agpatakder iti multi-purpose curing barn ken green dryer ken P50,000 para kadagiti mangsimpa iti pugonda.

“Adda dagiti kayatna nga agsubli nga agmula iti tabako ngem problemada ti pugonda, ket daytoy ti sungbatna,” panangilawlawag ni de Peralta.

Nupay kasta, kinuna ni de Peralta nga awan pay ti naaramid nga implementing guidelines para iti nasao nga assistance isu nga awan pay ti naan-anay nga impormasion a maitedda mainaig iti daytoy a programa.

Bayat ti naangay a Pre-Consultative Conference on the Proposed Tobacco Floor Prices a naangay iti kapitolio idi Agosto 26 a timmabunuan dagiti mannalon ditoy probinsia, indagadag ni Gov. Deogracias Victor Savellano ti itutulong ti NTA iti pannakabangon dagiti pugon a mausar iti panagluto iti birhinia a tabako tapno di pay isu nga ibaklay a gastuen dagiti mannalon.

“Adda pondo ti ahensia iti pannakabangon ti paktoria iti tobacco dust iti Sto. Tomas, La Union, kayatna ngarud a sawen nga adda met umdas a pondo ti NTA tapno matulongan dagiti mannalon,” kinuna ni Savellano idinto nga innayonna a “ti idadakkel ti kita dagiti mannalon iti tabako ti kangrunaan.”

Kinuna pay ti gobernador a masapul a takuaten dagiti eksperto ti NTA no kasano a mapaadu ken umatitiddog dagiti binulong ti tabako tapno dakdakkel ti paglakuan dagiti mannalon, kasta met ti pannakaipababa ti gastos iti produksion kangrunaanna ti mausar a ganagan ken insektisidio ken ti pannakapatalinaed ti natibker a presio dagiti partuat a bulong ti tabako.

Kinuna ni Savellano a nupay napintas nga alternatibo dagiti tobacco by-products kas iti tobacco dust, tobacco pulp ken bioethanol ngem nasaysayaat nga amang no ti kangrunaan nga usar dagiti bulong ti tabako ti maipangruna nga ipaayan ti ahensia iti imatang.

Iti dayta a miting, napagtitinongan dagiti dadaulo a mannalon nga idatagda iti tripartite conference ti P31.20 a maituon iti floor price ti tabako tunggal kilo.

Iti napalabas a tobacco season, immabut ti presio ti tabako iti nasurok a P90 kada kilo iti Class A ken P50 kada kilo iti reject.#