BANNER NEWS: Di panagtunos ti lehislatibo, ehekutibo: proyekto manipud R.A. 7171, agpeggad a maabutan iti election ban

SINAIT, Ilocos Sur – Agpeggad a maabutan iti election ban dagiti proyekto a mapunduan manipud iti bingay daytoy a munisipalidad iti R.A. 7171 no saan latta nga agtunos ti sangguniang bayan ken ti ehekutibo ditoy.

Itay nabiit, kimmudrep manen ti pannakaimplementar dagiti prioridad a proyekto kadagiti barangay ditoy a mapunduan manipud iti bingay ti munisipalidad iti tobacco excise tax gapu iti rimsua a saan manen a panagkinnaawatan ti sangguniang bayan ken ti ehekutibo.

Idi napan a bulan, napagtutunosan dagiti dadaulo dagiti nadumaduma a barangay ditoy nga ili nga agpapada ti bingayda manipud iti excise tax ti tabako kas intuding ti R.A. 7171 tapno marisuten ti problema ket mayimplementaren dagiti proyekto a nakaisangratan daytoy a pondo.

Iti surat ti sangguniang bayan ken ni Mayor Marlon Ines, naipakaammo iti ama ti ili babaen ken ni Konsehal Glen Guzman a napagnunummuanan dagiti konsehal ti equal sharing ket kiniddawda iti mayor ti pannakabalbaliw ti dati a listaan dagiti priority a barangay a maikkan iti pondo manipud iti R.A. 7171.

Ngem insungbat ni Ines nga indatagnan iti sangguniang bayan idi pay napalabas a tawen ti listaan dagiti a barangay a prioridad a maikkan iti proyekto a mapunduan manipud iti bingay ti munisipalidid iti R.A. 7171 ken iti panangkiddawna iti sangguniang bayan ti panangaramidna iti appropriation ordinance para iti pannakaimplementar dagitoy a proyekto.

Innayon ti mayor a saan nga iti opisinana ti nakagapu iti pannakataktak iti pannakabingay ti pondo manipud iti nasao a linteg no di ti sangguniang bayan gapu iti saanda a pannakaipasa iti appropriation ordinance a nabayagen a naidatag kadakuada.

Maipalagip a maiwaras koma iti 30 a barangay ti immuna a naruk-atan a bingay ti munisipalidad iti R.A. 7171 nga agdagup iti P5.8 million ngem saan nga inanamongan ti sangguniang bayan agsipud ta awan ti bingay ti 14 a barangay a kaadduanna ti kangrunaan nga agmulmula iti tabako.

Iti maysa a dialogo nga inangay ti ehekutibo babaen ti initiatibo ni Mayor Marlon Ines, insingasingna a pagbibingayan dagiti 14 a barangay ti P1.5 million a maikadua a release ti bingay ti munisipalidad iti R.A. 7171 ngem saan nga immanamong dagiti maseknan a barangay captains.

Iti emerhensia a miting nga inangay dagiti barangay captains, napagtitinonganda a pagtiponen ti umuna ken maikadua a release ti R.A. 7171 tapno daytoy ti pagbibingayan dagiti 44 a barangay ditoy nga ili.

Aganay a P166,000 ti bingay ti tunggal barangay babaen ti equal sharing.

Impeksa ti maysa a barangay captain ti amakna a no saan nga agtunos ti sangguniang bayan ken ti mayor, agpeggad a maabutan ti election ban ti pannakaimplementar dagiti prioridad a proyekto dagiti barangay a mapunduan manipud iti R.A. 7171.#