BANNER NEWS: Di pannakibiang ti kapitolio iti pannakamanehar dagiti ospital, indagadag ti bise gobernador

VIGAN CITY – Kinuna ni Vice Governor Jerry Singson a saan koma a biangan ti kapitolio ti pannakamanehar dagiti ospital ditoy probinsia tapno ad-adda pay a mapasayaat ti serbisioda ti salun-at.

Kinuna ni Singson a supervisory laeng koma ti akmen ti provincial capitol ket bay-anna a dagiti hepe dagiti ospital ti mangmanehar kadagitoy a balay-pagagasan.

Innayon ni Singson a “napimpintas nga amang” nga agballigi nga economic enterprise dagiti ospital iti probinsia no dagiti dodoktor ti mangmanehar kadagitoy a saan a biangan ti kapitolio.

“Supervisory laeng koma ti responsibilidad ti provincial capitol ket baybay-anna a dagiti dodoktor ti mangmanehar kadagiti ospital,” kinuna ni Singson bayat ti programana a JCS, Kakibin ti Balligi a naipatangatang iti DWRS itay nabiit.

“Tapno agandar nga economic enterprise dagiti ospital, bay-antayo ida a mangmanehar,” kinuna pay ni Singson.

Kinuna ni Singson a ti pannakaited iti gundaway kadagiti hepe dagiti ospital a mangmanehar kadagiti district hospitals ti nabayagen nga ilablabanna.

“No palpak ti pannakamanehar dagiti ospital, pabasolentayo dagiti hepe, ngem no napintas ti panangmaneharda, baybay-antayo ida, ikkantayo ida iti gundaway tapno papintasenda, pasayaatenda ti serbisioda,” kinuna ti bise gobernador.

Nadakamat pay ni Singson nga idi damdamo, uray pondo dagiti ospital ket biangan ti kapitolio.

“Baybay-antayo koma nga isuda ti mangiprograma, isuda ti mangigasto iti budgetda tapno masurot ti programada,” kinunana.

Linagidawna pay ti pannakibiang ti kapitolio iti procurement ken bidding dagiti medisina ken medical supplies.

“Ania koma ti ammo ti kapitolio kadagita?” sinaludsod ni Singson idinto a nadakamatna a nanginngina ti presio ti agas a magatang iti ospital ngem kadagiti parmasia iti ruar.

Kinuna ni Singson a mangaramidda iti linteg tapno adda pagtaktakderan dagiti hepe dagiti ospital iti panagmaneharda tapno saan ida a mabiangan ti kapitolio.#