BANNER NEWS: Dua programa ti salun-at ti gobierno probinsial, confusing, conflicting: hepe dagiti district hospitals

VIGAN CITY – Kinuna dagiti hepe dagiti nadumaduma a district hospitals iti probinsia a “confusing” ken “conflicting” dagiti programa ti salun-at ti gobierno probinsial mainaig iti economic enterprise dagiti ospital ken ti botika ti probinsia.

Iti surat nga indanonda bayat ti session ti sangguniang panlalawigan itay Hulio 14, kinuna dagiti hepe dagitoy a district hospitals ken dagiti mangngagas a “sangsangkamaysada iti gannuat ti gobierno probinsial a mangipaay iti kasayaatan a programa ti salun-at kadagiti kailian” ngem “makatikaw” ken “agsupanget” ti programa ti economic enterprise ken ti botika ti probinsia ket kiniddawda ti nainget a konsultasion ken forum kadagiti amin nga stakeholders.

Igangannuat ti gobierno probinsial ti pannakaimplementaren ti economic enterprise a maitulad iti La Union Medical Center ken iti botika ti probinsia a pagtuladanna ti Botika ng Lalawigan ng Cavite (BLC).

Babaen ti economic enterprise, mamaximize dagiti pamastrekan dagiti ospital tapno daytoy ti pamataudanda iti busbosenda iti operasionda.

Iti sabali a bangir, mangipasdek ti gobierno probinsial iti botika ti probinsia a paggatangan dagiti district hospitals kadagiti nalaklaka ken de-kalidad nga ag-agas.

Ngem kuna dagiti hepe dagiti district hospitals a “confusing” ken “conflicting” dagitoy dua a programa ti salun-at ti gobierno probinsia ket kiniddawda a maisayangkat pay dagiti forum ken konsultasion tapno naan-anay a maawatanda.

Kas reaksionna, kinuna ni Gov. Deogracias Victor Savellano a naibagbagan ti economic enterprise kadagiti hepe dagiti district hospitals ti probinsia bayat ti workshop ti Executive Legislative Agenda iti Tagaytay City idi pay la 2007 ken malaksid kadagiti naangay a miting, naibaonda pay iti Cavite tapno agobserbada mainaig iti botika ng lalawigan daytoy.

Linagidaw pay ti gobernador no apay nga iti sangguniang panlalawigan ti nakaitedan ti surat a saan a naideretso kenkuana.

Kinuna ti gobernador a saan a kasapulan ti rangtay para iti pannakidialogo dagiti hepe ken empleado dagiti district hospitals ta posible a matrapik iti rangtay ket ad-adda a mataktak ti pannakidialogoda kenkuana.

Ngem kinuna ni Vice Gov. Jeremias Singson nga adu ti maaw-awatna a text messages ken tawag manipud kadagiti dodoktor a mangibagbaga nga adu pay dagiti dida maawatan maipapan kadagiti dua a programa ti salun-at ket kiniddawda ti naan-anay a forum ken konsultasion.

Segun iti bise gobernador, pito iti walo a hepe dagiti district hospitals ti nagpirma iti surat a nangibatad a “confusing” ken “conflicting” dagiti dua a programa ti salun-at ti gobierno probinsial.

Kinuna ti bise gobernador a dakdakkel ti basolda nga agtuturay no maituloy ti implementasion ti economic enterprise ken ti botika ti probinsia “no aggugulo dagiti dodoktor iti district hospitals ta dida ammo ti ar-aramidenda”.

Kiniddaw ni Savellano ti panangaprobar ti sangguniang panlalawigan iti resolusion a mangbuangay iti provincial pharmacy ngem saan pay nga inaksionan ti konseho ti probinsia ti nasao a resolusion.#