BANNER NEWS: Gobierno probinsial, tuonanna P1/kilo paggatgatang NFA iti irik

VIGAN CITY – Tapno matulongan dagiti mannalon a nadidigra iti napalabas nga iduduprak ti Bagyo Pepeng iti Ilocos Sur, nayonan ti gobierno probinsial iti P1 ti agdama a paggatgatang ti NFA iti irik.

Napirmaan ti Memorandum of Agreement on Palay Assistance Program for Legislators and Local Government Units (PALLGU) iti nagbaetan ti gobierno probinsial iti panangibagi ni Gov. Deogracias Victor “DV” Savellano ken National Food Authority babaen ti panangibagi da NFA Asst. Regional Director Basilides Taco ken NFA Provincial Manager Fortunato Bulao idi Oktobre 14. Sinaksian daytoy dagiti farmer leaders ken agduduma a kooperatiba babaen ti panangidaulo ti presidente ti Provincial Farmers Action Council (PFAC) a ni Salvador Cadorna.

Naipalaon iti nadakamat a MOA a nayonan ti gobierno probinsial iti P1 ti P17 nga agdama a paggatgatang ti NFA iti irik tapno agbalin a P18 tunggal kilo ti presio ti irik.

Segun ken ni Savellano, maysa daytoy kadagiti rehabilitation program ti probinsia tapno matulongan dagiti mannalon a nadidigra iti napalabas a kalamidad gapu ta sigurado a kimmisang ti apit dagitoy.

Iti report ti opisina ti provincial agriculturist, umabot laeng iti 40% iti namnamaen a produksion ita a tawen gapu iti pannakalayus dagiti mula a pagay.

Inkari met ni Taco ti naan-anay a suportana iti nadakamat a panagkinnammayet ti gobierno probinsial ken NFA a makatulong kadagiti mannalon.

Kinuna ni Savellano a madama ti pannakipatang iti NFA Central office tapno mapatgan ti kiddawda a panaggatang ti probinsia iti bagas iti presio a P16.75 kada kilo a mailako iti nalaklaka pay a presio kadagiti kaprobinsiaanda a naapektaran iti bagyo. No maaprobaran, mangipasdek ti gobierno probinsial iti sumagmamano a rolling stores tapno dagitoy ti mangidanon iti bagas kadagiti aggatang.#