BANNER NEWS: Ilocos Sur, Grand Slam kas Best PRP Implementer iti Rehion I

VIGAN CITY – Maisaad ti gobierno probinsial ti Ilocos Sur iti Hall of Fame gapu iti tallo a tawen a nagsasaganad a pannakapilina kas Best Poverty Alleviation Program Implementer iti sibubukel a Rehion I.

Sakbayna, inawat ti gobierno probinsial ti Ilocos Sur babaen ken ni Gov. Deogracias Victor “DV” Savellano ti pammadayaw kas Best PRP Implementer bayat ti naangay a seremonia iti CAP building ditoy siudad ti Vigan itay Oktubre 30, 2009.

Iti panagsarita ni Gov. Savellano, kinunana a naisangsangayan ti nadakamat a pammadayaw ta narekognisarda kabayatan ti panagserbida kadagiti napanglaw a kaprobinsiaan.

“Daytoy ti mangipakita iti panagkaykaysa ti grupo ti probinsia ken dagiti kaprobinsiaan iti pannakapugipog ti kinapanglaw ditoy,” kinuna ti gobernador.

Kangrunaan a programa ni Savellano kontra kinapanglaw ti Kakailian nga Agnaed iti Barangay Sangsangkamaysa nga Aagrang-ay Tayo (KABSAT) Outreach Program, SAlun-at ken RANg-ay AYuda ti panagkaykaysa (SARANAY), panagiwaras iti piek a Sasso kadagiti organisasion, ti pannakaiyestablisar ti libre a Home for the Aged a naawagan iti BALAY TARIPATO iti Magsingal, panagiwaras iti agduduma nga exotic fruit trees kas iti lansones, marang ken rambutan kadagiti upland municipalities, ti pannakaipasdek ti BaRang-ay Demofarm, ti TAGIBIKA a nakaipalaonan ti amin a programana iti pannakatagiben ti aglawlaw, panagited iti agduduma a makinaria para iti pannakapadakkel dagiti Small and Medium Enterprises (SMEs), ti agtultuloy a pannakaited iti allowances kadagiti provincial scholars, agtultuloy a pannakapasayaat dagiti pasilidade iti Ilocos Sur Community College, pannakaipasdek ti School of Living Traditions ken Special High School for Culture and the Arts ken dadduma pay.

Dinawat pay ni Savellano iti anti-poverty team ti probinsia a saan koma nga agpatingga ti panagtrabahoda kalpasan ti pannakapadayaw ti probinsia no di ket agbalin koma daytoy nga inspirasion tapno lalo pay nga igaedda ti mangpasayaat iti kasasaad dagiti awanan.

Kabayatanna, kiniddaw ni National Anti Poverty Commission (NAPC) Asst. Sec. Catherine Mae Santos nga agtultuloy koma latta dagiti proyekto dagiti LGUs para kadagiti napanglaw a pampamilia kagiddan ti panangdakamatna iti tema ti programa a “Stand United, Fight Poverty”.

“Masapul a tuladentayo dagiti best practices ti tunggal LGU tapno ipadastayo met iti luglugartayo,” kinuna ni Santos.

Napili kas 1st runner up ti Pangasinan, 2nd runner up ti Ilocos Norte ken 3rd runner up ti La Union iti provincial level.

Iti benneg ti municipal level inyalat ti Pinili, Ilocos Norte ti pammadayaw iti maikaduan a daras, 1st runner up ti Suyo, Ilocos Sur ken 2nd runner up ti San Gabriel, La Union.#