Footer

BANNER NEWS: Isyo a nairuar kontra ken ni Lucio Tan, alegasion laeng: bise mayor

VIGAN CITY – Kinuna ti bise mayor ditoy nga alegasion laeng dagiti isyo a dinakamat ti maysa a naikkat nga empleado maikontra iti dati nga employerna a negosiante nga Intsik ken adda iti labes ti hurisdiksion ti konseho daytoy a siudad.

Daytoy ti bugas ti pannakipatpatang ni Vigan City Vice Mayor Franz Ranches ken ni Jun Ramos, anchorman iti programana a “Konseho ti Vigan” a naipatangatang iti DWRS itay Hunio 23.

“Adu dagiti concerns nga inad-adalmi… a beyond the jurisdiction of the city council,” kinuna ni Ranches idinto nga impaganetgetna nga “it’s high time a masapul a maisardengen daytoy tapno ti pudno ken ti rumbeng ti maaramid” mainaig dagiti alegasion ni Elpidio Que, dati a regional sales manager ti Asia Brewery Inc. para iti Northern Luzon, maikontra ken ni dati nga employerna a Lucio Tan.

Kinuna ti bise mayor a nai-refer dagiti isyo nga imparuar ni Que iti committee on revenues ken oversight “ngem medio saan met a nagargaraw ngamin” isu a napanunotna nga iggaman ti committee of the whole nga idauluanna tapno maikkanen dagiti isyo iti pannakairikep.

Dinakamat ti bise mayor a kayat ni Que a sukimaten ti konseho dagiti libro dagiti kompania nga identified ken ni Tan kasta met dagiti marketing arms dagitoy a kompania gapu iti alegasionna a mapapati a dummy corporation ni Tan dagitoy ken agkurkurang ti baybayadanda a buis iti city government.

Kinuna ni Ranches nga adda pay alegasion ni Que a saan nga aggargaraw ti konseho ken aleng-alengna dagitoy nga imparuarna nga isyo.

Kinuna ti bise mayor nga agtigtignay ti konseho iti las-ud ti hurisdiksionna ket no maipapan dagiti agkurkurang a buis a baybaybayadan dagiti kompania ni Tan, “…saan nga akem ti sangguniang panlungsod dayta.” ta “no national tax, akem ti Bureau of Internal Revenue… no local tax, akem ti tesoreria ket no dummy corporations, ti Securities and Exchange Commission.”

Kinuna ni Ranches a rumbeng a dagiti appropriate agency ti pangibagaan ni Que kadagiti alegasionna idinto nga innayonna nga “in aid of legislation laeng ti panagimbestiga ti konseho”.

Kinuna ni Ranches a dida met kayat iti city council a (kasla) maprespressure maipanggep laeng dagiti insinuations, saosao, …word of mouth idinto nga inyunay-unayna a “…just allegations, just statements” dagiti isyo nga imparuar ni Que ta awan met ti pormal a complaint ken saanda met nga under oath.

“Agtignay ti city council iti las-ud ti hurisdiksionna…ngem adda pagpatinggaanmi…” kinuna pay ni Ranches.

“Enough is enough. Masapul nga adda pagpatinggaanna,” kinuna ni Ranches sana innayon a mangiparuarda iti report iti mabiit ta “kayatmi metten nga adda closure dagiti alegasion nga iruruarna (Que).”#