Footer

BANNER NEWS: Iti panagturay ni Pres. Cory, Ilocos Sur kadakkelan sinagrap nga imbag: Vice Gov. Jerry

VIGAN CITY – Ti Ilocos Sur ti kadakkelan ti sinagrap a pagimbagan bayat ti panagturay ni nag-Presidente Corazon Aquino a pagnanaaranna pay laeng agingga ita, daytoy ti impalgak ni Vice Gov. Jerry Singson itay nabiit.

Kinuna ni Singson a maysa a resolusion ti impasa ti sangguniang panlalawigan babaen ti maysa nga espesial a session itay Agosto 3 a nangipeksaanda iti pannakipagriknada iti pamilia ni Pres. Corazon Aquino iti ipupusayna ken iti panangpadayawda kenkuana gapu ta isu ti “nangi-restore iti demokrasia” iti pagilian ken gapu ta isu ti Presidente a nangpirma iti R.A. 7171 nga inaramid ni Dip. Luis “Chavit” Singson”.

“Agpayso met nga isu ti nagpirma. No awan ni Pres. Cory, awan koma met ti R.A. 7171,” kinuna ni Singson idinto nga innayonna nga iti baet ti “nagkaro a panagpolitika idi ngem babaen ti ayatna ket pinirmaanna” iti baet a nairaman ti Ilocos Norte a probinsia daydi napadisi a Presidente Ferdinand Marcos, Jr.

“Makita a ni Apo Cory awan ti pempempenenna a sakit ti nakemna…” kinuna ni Singson.

Maipalagip a napapatay daydi nag-senador Benigno Aquino, Jr., kaingungot ni Pres. Cory, iti tarmac ti Manila International Airport (NAIA itan) idi naggawid ditoy pagilian.

Sumagmamano nga opisial ken soldado ti nasentensiaan a mabalud iti pannakapapatay ti nalatak a kameng ti oposision.

Impetteng ti pamilia daydi Marcos nga awan ti pannakainaigda iti nasao a pammapatay.

“Kadagiti amin a local government unit iti intero a pagilian, datayo ti kadakkelan ti nasagrap iti panagturay ni Pres. Cory ket daytoy R.A. 7171 ket agpapan ita, nannanamentayo, agraman ti Abra, Ilocos Norte ken La Union,” kinuna ti bise gobernador.

Kabayatanna, maysa met a tribute ti impaay ti sangguniang panlungsod ditoy a siudad ken daydi nag-Presidente Aquino.

Babaen ti maysa a power point presentation, naiparang dagiti kangrunaan a paset ti biag ni Pres. Aquino agingga idi nagsakit a puon ti ipapatayna.

Kinuna ni Singson nga idanondanto ti inaramidda a resolusion ken ni Sen. Benigno Aquino III iti Senado.#