VIGAN CITY – Kinuna ti bise mayor ditoy nga irebioda ti katulagan a nagpipinnirmaan ti city government, Agencia Espanola de Cooperation Internacional ken ti Metro Vigan Water District no maipatpatungpal met laeng ti preferential rate ti danum a maited kadagiti residente ditoy siudad.
“Masapul a nalaklaka ti rate a maiyaplikar iti siudad ti Vigan,” kinuna ni Vice Mayor Franz Ranches idinto nga inkalinteganna a ti Vigan City ti instrumento a simmayaat ti serbisio ti Metro Vigan Water District babaen ti tulong ti Spanish government.
Nairiing daytoy nga isyo gapu iti resolusion nga indatag ni Konsehal George Villanueva a mangkidkiddaw iti Metro Vigan Water District a mangipababa iti penalty charge kadagiti consumers ditoy a maladaw nga agbayad iti nakunsumoda a danum.
Mangipakpakat ti MVWD iti 10% a penalty charge no maladaw ti consumer nga agbayad iti nausarna a danum.
Segun iti bise mayor, irebioda dagiti billing statements dagiti consumers ti Vigan City sada ikumpara kadagiti billing statements dagiti kabangibangna nga ili a sakup ti Metro Vigan Water District tapno makita no adda pakaidumaan ti water rate a baybayadan dagiti taga-Vigan City kas nailanad iti katulagan.
“… Ditoy a kitaenmi no masursurot met laeng ti preferential rate a maited kadagiti consumers ti Vigan City,” kinuna ni Ranches.
Kinuna ti bise mayor a benepisio daytoy para kadagiti taga-Vigan gapu ta ti siudad ti Vigan ti instrumento a napasayaat ken narehabilitar ti serbisio ti Metro Vigan Water District babaen ti tulong ti Spanish government.
‘Masapul a respetaren ti Metro Vigan Water District ti kontrata a pinirmaanna,” kinuna ni Ranches idinto nga inyunay-unayna a nabayagen nga agop-operar ti nasao a water district kalpasan ti pannakarehabilitarna babaen ti tulong ti Spanish government.
Segun iti bise mayor, mapaayaban dagiti board of directors ken management ti MVWD tapno mairiing daytoy nga isyo.#