BANNER NEWS: Konseho ti Santa, agduadua iti baro a land area ti Vigan

VIGAN CITY – Maysa a dialogo ti naisayangkat itay Septiembre 16 iti nagbaetan ti sangguniang panlungsod ditoy ken dagiti agtuturay ti Santa tapno malawlawagan ti panagduadua dagiti naud-udi a nakakaut ti Vigan iti daga a sakup ti nasao nga ili.

Sakbayna, maysa a resolusion ti impatulod ti sangguniang bayan ti Santa iti sangguniang panlungsod ditoy a nakailanadan ti panagduaduada iti dakkel a limmawaan ti land area daytoy a siudad. Adda suspetsa dagiti agtuturay iti Santa a “natippingan” ti land area ti ilida gapuen iti naduktalan iti parcellary survey nga insayangkat ti Department of Environment and Natural Resources, Region I a dimmakkel ti land ti area ti Vigan City.

Segun iti surbey nga insayangkat ti DENR, Region I, nagbalin a nasurok a 28 square kilometers ti land area ti Vigan City manipud iti 25.48 kas nasertipikaran idi nagbalin a siudad.

Ngem kinuna ni Vice Mayor Franz Ranches nga iti inisial a dialogo nga insayangkatda kadagiti agtuturay kadagiti kabangibang ti Vigan nga ili, inlawlawagda a nupay dimmakkel ti land area ti siudad, narespeto ken saan a nakutkuti ti land area dagitoy.

“…No malagipyo, idi nagaplikar a siudad ti Vigan, nasurok a 25.11 sq. kms. ti naidatag a land areana ngem ti ammomi kas rumrummuar kadagiti maisubsubmite nga economic profilena, nasurok a 27.4 sq. kms.,” kinuna ni Ranches bayat ti programana a “Ti Konseho ti Vigan” a naipatangatang iti DWRS itay Septiembre 15.

Innayon ti bise mayor a maibatay iti resulta ti geographic information system babaen ti aerial photographs ti Vigan, nakitada nga adda dagiti saan a nag-reflect nga areana, nga adda kurangna, isu a tapno maammuan ti pudpudno a kalawana, nagkiddaw ti gobierno ti siudad iti DENR Region I a mangisayangkat iti parcellary survey ket “ita rumrummuar a nasurok a 28 sq. kms. ti land area ti Vigan.”

Kinuna ni Ranches a tapno agbalin nga opisial ti surbey ti DENR, masapul ti compliance wenno panangkanunong dagiti kabangibang ti Vigan nga il-ili iti nasao a surbey.

Kinuna ni Ranches nga awan met ti problema kadagiti agtuturay ti Caoayan, Bantay ken Sta. Catalina mainaig iti resulta ti surbey nga insayangkat ti DENR Region I.

“Ngem itay nabiit, nakaawatkami iti resolusion manipud iti sangguniang bayan ti Santa a nangilanadanda iti isusupiatda iti resulta ti surbey nga insayangkat ti DENR Region I,” kinuna ni Ranches sana innayon a mapanda tumabuno iti session ti sangguniang bayan ti Santa tapno ti regional director ti DENR, Region I mismo ti mangilawlawag iti resulta ti surbey.

“”Adda perception (dagiti agtuturay) iti Santa nga adda naala a land area daytoy,” kinuna ti bise mayor sana inyunay-unay a narespeto ti land area dagiti kabangibang nga ili ti Vigan City, ken “saanna nga inakkupan” ti land area dagitoy.

“Dimi kayat a madadael ti nasayaat a panagkikinnamayyet dagiti kabangibang nga ili ti Vigan isu a mapankami iti joint session nga angayen ti Santa tapno malawlawagan ti amin,” kinuna ni Ranches.

Segun iti bise mayor, dakkel a banag iti Vigan ti pannakakorehir ti pudno a land areana agsipud ta kaipapananna ti idadakkel ti internal revenue allotment ti siudad.

“Kayatmi metten a maurnos daytoy tapno awanen ti problema iti masakbayan,” kinuna ni Ranches.#