Footer

BANNER NEWS: Konseho ti Sto. Domingo, nagbutosda iti 7-2-1 maikkan 3-termer officials cash incentive

STO. DOMINGO, Ilocos Sur – No mabalin dagiti three-termer a provincial officials a sagutan ti bagbagida iti cash incentive, kasla virus daytoy a makaakar ken mangkapet kadagiti town officials a kas iti daytoy nga ili.

Naaprobaran itay nabiit iti maikadua a pannakaibasana ti maysa nga ordinansa a mangited iti umarngi nga insentibo kadagiti agtuturay ditoy nga ili a makaturpos iti tallo nga agsasagannad a termino.

Sagudayen ti nasao nga ordinansa a maikkan iti cash incentive ti mayor, bise mayor, konsehal, SK Federated president ken ABC Federated president nga agturpos iti tallo nga agsasagannad a termino.

Umawat ti agturpos a mayor iti P300,000, ti bise mayor iti P250,000, ken sag-P200,000 dagiti konsehal, SK ken ABC Federated president.

Ngem nagdalan iti nabara a diskusion daytoy nga ordinansa nga inesponsoran ni Konsehal Henry Palpallatoc agsipud iti panirigan ti sumagmamano a konsehal a self-serving daytoy gapu ta isuda a nakatugaw a mangaprobar ti mabenepisiaran.

Kinontra ni Konsehal Michael Figueras ti nasao nga ordinansa idinto a kinunana a   “nakababain ta self-serving” daytoy gapu ta isuda ti mangaprobar ngem isuda a nakatugaw ti mabenepisiaran.

Ngem inkalintegan ti maysa a konsehal nga agduma ti sueldo iti benepisio.

Kinuna met ni Konsehal Tom de Vera nga awan ti problema iti legalidad ti ordinansa “ngem self-serving latta” daytoy agsipud ta isuda ti mabenepisiaran.

Kinuna ti konsehal nga adu ti gumawgawawa a proyekto ket dagitoy laeng koman ti pakaipaayan ti pondo.

Ngem iti naisayangkat a panagbubutos, pito a konsehal ti nangpabor, 2 ti kimmontra idinto a maysa ti nag-abstain. Da laeng Figueras ken de Vera ti nagbutos a kimmontra.

Naikalendario ti ordinansa para iti maikatlo ken pinal a pannakaibasana iti sumaruno a session.

Maipalagip nga itay nabiit, inaprobaran ti sangguniang panlalawigan ti  ordinansa nga indatag ni Board Member Chuchi Purisima a mangipaay iti cash incentive kadagiti opisial ti probinsia a nagturpos iti tallo nga agsasaganad a termino.

Umawat ti gobernador ken ti bise gobernador iti sag-P1 million ken dagiti board members iti sag-P700,000.

Ngem naglak-am ti bokala iti pammabalaw gapu iti daytoy nga indatagna nga ordinansa.

Addan iti maikatlo a termino ni Purisima ket maysa kadagiti mabenepisiaran iti nasao nga ordinansa no agbalin a linteg.

Ngem inkalintegan ni Purisima a maysa a first class a probinsia ti Ilocos Sur ket adu ti pamastrekanna a pangalaan iti pondo para iti nasao a cash incentive.

Kinuna ti bokala nga inadaptarda laeng ti inaramid ti Vigan City ken Candon City a nangipasa iti ordinansa a mangited iti cash incentive kadagiti city officials a nagturpos iti tallo nga agsasagannad a termino.#