Footer

BANNER NEWS: Meat vendors ti Vigan City, nagkiddaw maipangato presio ti karne ti baboy

VIGAN CITY –  Saganaan dagiti aggatgatang ti nangatngato a presio ti karne ti baboy ditoy siudad gapu ta kayat manen dagiti aglaklako nga ingato ti presio daytoy a tagilakoda.

Maysa a surat ti impatulod ti Vigan Meat Vendors Association iti konseho ti siudad a naiturong ken ni Vice Mayor Franz Ranches a nangkiddawanda iti temporario a pannakaingato ti presio ti karne ti baboy gapu iti mapapati a panagkurkurang ti suplay dagiti maparti a baboy ken kinangina iti pagpakan.

Sangapulo a pisos ti kidkiddawen ti VMVA a pakaingatuan iti presio ti karne ti baboy a mailako iti tiendaan publiko.

Iti agdama, P150 ti presio ti karne ti baboy tunggal kilo iti tiendaan publiko ditoy siudad.

Kinuna pay ti surat dagiti meat vendors a sidadaanda a mangisubli iti dati a presio ti karne ti baboy no ag-stabilize ti suplay ti baboy a maparti a mailako iti tiendaan publiko.

Ngem sumagmamano nga aggatgatang a kinapatang ti Tawid News mainaig iti daytoy a surat ti VMVA ti nagkuna a siento porsiento a patgan dagiti konsehal ti kiddaw dagiti aglaklako, kas kapaliiwanna iti kallabes.

Kinuna met ti sabali pay nga aggatgatang a mapampanuynoyan dagiti aglaklako iti karne gapu ta uray labsingenda ti linteg, “kid’s glove treatment” ti it-ited dagiti konsehal kadakuada.

Dinakamat ti nasao a consumer ti napasamak itay kallabes a tawen nga impangato lattan dagiti meat vendors ti presio ti karne sakbay nga aprobaran ti konseho ti petisionda a price increase a maysa a panaglabsing iti linteg ngem pinakawan ida dagiti konsehal kalpasan ti panagpadispensarda.

Idi napan a tawen, nagpetision ti VMVA a maingato ti presio ti karne ti baboy manipud iti P140 iti P150 iti kada kilo.

Ngem iti baet a madama pay la nga ad-adalen ti konseho ti nasao a petision, kellaat nga impangato dagiti aglaklako ti presio ti karne ti baboy.

Insubli met laeng dagiti aglaklako iti dati a presio ti lakoda gapu iti panagreklamo dagiti aggatgatang ken iti ballaag ti konseho a makasuanda iti panaglabsing iti  R.A. 7581 wenno Price Act gapu iti panangipangatoda iti presio ti lakoda a karne a di pay naaprobaran ti petisionda.

Naipaima ti kiddaw dagiti meat vendors iti komite ti agrikultura nga idauluan ni Konsehal Andres Adriatico ken iti komite iti market nga idauluan ni Konsehal Henry Formoso para iti pannakaadalna.#