BANNER NEWS: Opisialen: Chavit, agkandidato para gobernador

VIGAN CITY – Nagbalinen nga opisial: agtaray manen ni Deputy National Security Adviser Luis “Chavit” Singson para gobernador iti Ilocos Sur iti eleksion inton Mayo 2010.

Pinukaw ni Singson dagiti ispekulasion iti politika iti masungad nga eleksion babaen ti panangipilana iti certificate of candidacyna (COC) iti Commission on Elections ditoy probinsia para iti kinagobernador itay Nobiembre 25.

Sinaruno ti laklakay a Singson ti anakna a ni Diputado Ronald Singson a nangipila met iti panagpailayonna kas mangibagi iti umuna a distrito ti Ilocos Sur.

Saan a kas iti napalabas a panagpipila iti kandidaturana a kuyogen ti sibubukel a bunggoy a napan iti opisina ti Comelec, iti daytoy a gundaway, kadua laeng ti gobernador ni Bokal Jerry Lahoz a nagipila iti COCna iti alas nuebe ti bigat ti Nobiembre 25.

Kadagiti immun-una nga interbiona iti media, imparipiripen ni Singson ti panagkandidatona manen kalpasan ti pannakaabakna para iti kinasenador idi 2007.

Nupay kasta, no damagen ti media no kinagobernador, inyangaw ni Singson nga uray konsehal no isu ti pagayatan dagiti dadaulo ti partido.

Iti daytoy a panagsublina kas gobernador, impanamnama ni Singson ti panangituloyna ti sirmatana nga agbalin nga industrialisado ti probinsia.

Kinuna ni Singson a no naan-anayen nga agbalin a Free Port Zone ti Salomague, sumangpet dagiti paktoria ken dagiti dadakkel a negosio a mangbatir iti ekonomia ken mangpadur-as iti probinsia.

Innayon pay ti dati a gobernador a no maipasdekton ti Salomague Free Port Zone ken gapu iti kaasidegna iti China, aglippias ditoy probinsia dagiti negosio manipud iti daytoy a pagilian a mangited kadagiti pagsapulan ket saanton a mapan pay mangged iti ballasiw taaw dagiti umili ditoy.

Iti daytoy a panagsubli ni Singson, agpababa ni Gov. Deogracias Victor Savellano a kas bise gobernador ken ni Vice Gov. Jerry Singson a kas bokal.

Maymaysa laeng a puesto iti kina-bokal ti mabakante iti masungad nga eleksion gapu ta maikatlon a termino ni Bokala Chuchi Purisima ngem maal-alimadmad a maited ti puesto iti maysa nga anakna.

Kasta met a maal-alimadmad a saanen nga agpailayon ni Bokal Lahoz iti baet nga isu ti maysa kadagiti kaaktibuan a bokal iti sangguniang panlalawigan.

Ngem maysa a dina kayat a painaganan nga agpalpaliiw iti politika ditoy probinsia ti nagkuna nga agsubli ni Singson gapu iti damag a kumandidato manen ni dati a Bokal Efren Rafanan, Sr.

Iti panagsango da Savellano ken ni Rafanan idi 2007 para iti kinagobernador, bassit laeng ti nangarusan ti immuna iti naud-udi iti baet nga awan ti mayor a nangitandudo ken ni Rafanan.

Nangipila ni Rafanan iti protesta gapu iti alegasionna a panagsuitik iti nasao nga eleksion ngem agingga ita, awan pay ti resultana.

Naituding nga agipila dagiti kapartiduan ni Singson a pakaibilangan da Savellano ken ti kabsatna a ni Jerry iti kandidaturada inton Sabado, Nobiembre 28.#