BANNER NEWS: Pagtaktakderan ti League of Cities kontra panagsiudad dagiti capital towns, suportaran ti Vigan City

VIGAN CITY – Supsuportaran daytoy a siudad ti pagtaktakderan ti League of Cities of the Philippines (LCP) maikontra iti gakat a mamagbalin a siudad amin a kapital ti probinsia a saanen a kasapulan nga aglasatda iti annual income requirement.

“Iti kallabes, sumursurot ti siudad ti Vigan iti League of Cities of the Philippines a mang- oppose iti daytoy (gakat),” kinuna ni Bise Mayor Franz Ranches sana innayon a pagtaktakderan ti LCP ti pannakasurot ti regular requirement iti panagbalin ti maysa nga ili a siudad.

Madama a matratratar iti Kamara ti House Bill No. 24 a pinutar ni Ann Hofer, mangibagi iti maikadua a distrito ti Zamboanga Sibugay, a nangiproponer iti automatiko a panagbalin a siudad ti ngulo ti probinsia a saanen a masurot ti annual income requirement.

Sagudayen ti nasao a gakat ti pannaka-exempt dagiti capital towns dagiti probinsia iti annual income requirement a P100 milion tapno makakualipika a siudad.

Naipalaon pay iti gakat a prioridad a makonbert a kas component city dagiti capital towns dagiti probinsia nga awanan pay iti siudad.

No agbalin a linteg daytoy, adda 27 a capital towns nga agbalin a baro a siudad.

Kinuna ni Ranches nga inaprobararen ti Sangguniang Panlungsod ditoy ti maysa a resolusion a mangkontra iti nasao a gakat a mangkonbert a siudad dagiti capital towns dagiti probinsia nga awan pay siudadna.

Kinuna bi bise mayor a no lumsot ti nasao a gakat iti Kongreso, bumaba ti internal revenue allotment dagiti agdama a siudad.

Dinakamat ni Ranches a nagdakkel ti naikkat iti IRA ti Vigan City idi napagbalin dagiti sangapulo ket innem nga ili a siudad uray saanda a nakapatar kadagiti requirement kas iti intuding ti local government code.

“Anianto laengen no maaprobaran ti gakat a mangikonbert ti capital town dagiti probinsia nga awan pay siudadna,” kinuna ni Ranches sana innayon a no maikkatan ti IRA ti Vigan, maapektaran ti operasionna.

Maipalagip a nangipila idi ti LCP iti petision a nangkontraanna iti panagbalin dagiti 16 nga ili a siudad a kunana a saan a konstitusional gapu ta na-exempt dagitoy iti requirement iti income, populasion ken land area.

Sinarurongan ti Korte Suprema ti LCP ket imbilinna ti panagsubli dagiti 16 a baro a siudad a kas ili.

Kinuna ni Ranches nga ar-aramiden ti siudad ti Vigan ti kabaelanna nga agbalin nga IRA-free idinto nga inyunay-unayna ti ad-adda a pannakapainget dagiti pamastrekan ti siudad kas iti tiendaan publiko, Playa de Oro, ken iti panagpastrekan iti buis.

“Saan nga agnanayon lattan nga agdepdepende ti siudad iti IRA. Masapul a dagiti pamastrekan ti mangitandudo,” kinuna ni Ranches.#