BANNER NEWS: Panagbayad iti PhilHealth premiums, tumulong dagiti district hospitals

VIGAN CITY – Kitkitaen dagiti opisial ti probinsia ti itutulong dagiti district hospitals iti pannakabayad dagiti Philhealth insurance premiums dagiti marigrigat nga umili ditoy probinsia iti sanguanan ti mapapati a saan a pannakatungpal ti gobierno probinsial daytoy a responsibilidadna.

Segun ken ni Vice Gov. Jeremias Singson, daytoy ti anggulo a kitkitaen ni Bokal Jerry Lahoz tapno masigurado a maiyenrol dagiti marigrigat nga umili iti probinsia.

Natratar iti naudi a session ti sangguniang panlalawigan ti maysa a gakat a mangitudtuding a maikkat ti 20% manipud iti mapaspastrek dagiti district hospitals iti PhilHealth program a pagbayad iti premium dagiti marigrigat a card holders ditoy probinsia.

Sakbayna, iti interbiona iti programana a JCS, Kakibin ti Balligi, nadakamat ti bise gobernador a kitkitaen ni Lahoz a dagiti district hospitals ti mangbayad iti premium ti PhilHealth insurance dagitiĀ  marigrigat nga umili babaen ti mapaspastrekda iti PhilHealth program.

“Tumulong dagiti nadumaduma nga ospital iti gobierno probinsial babaen ti panangbayadda iti premium dagiti PhilHealth card holders,” kinuna ni Singson idinto a linagidawna a “saan met a makapagtungpal ti probinsiaĀ  iti dayta a responsibilidadna.”

Innayon ti bise gobernadorĀ  a makisaranay dagiti district hospitals iti panagbayad iti PhilHealth tapno saan a maisakripisio dagiti kalugarantayo a narigat ti panagbiagna.

“Isu nga out of the income iti PhilHealth, isuda ti mangbayad iti premium, makisaranay iti probinsia tapno masiguradotayo a siento porsiento a maiyenrol dagiti kalugarantayo a manggundaway iti daytoy napintas a programa ti PhilHealth,” kinuna ni Singson.

Kinuna ti bise gobernador a nupay maysa daytoy a sakripisio dagiti district hospitals ta maikkatan ti mapaspastrekda, makatulongda iti gobierno probinsial iti responsibilidadna, ket no ad-adu dagiti PhilHealth card holders, ad-adu met dagiti pasiente a sumrek kadagiti ospital ti gobierno.

Impalagid ti bise gobernador nga iti baet a marigatan pay ti gobierno probinsial nga agbayad iti sueldo dagiti casual, iti premium ti PhilHealth card holders, iti utangna iti scholarship program, nakatatahor nga agpakulo iti fireworks, agala kadagiti artista, ken dadduma pay a paggastuan nga iti panagkitana, saan met nga importante ken saan a makatulong iti panagbiag dagiti mannalon.#