BANNER NEWS: Piek a Sasso a mailaklako iti nalaka a presio, saan a rekomendado a mataraken: provincial veterinarian

VIGAN CITY – Saan a rekomendado ti beterinario ti probinsia a mataraken dagiti manok a Sasso a mailaklako iti nalaka a presio.

Daytoy ti impakaammo ni Joey Bragado, provincial veterinarian, bayat ti interbio kenkuana iti Ilocos Sur Hotline itay Abril 18 iti DWRS babaen kada Station Manager Chato Alda ken ni Eugene Paet.

Kinuna ni Bragado nga adda dimmanon a damag iti opisinada nga aglaklako iti piek a Sasso iti nababa a presio ngem imballaagna kadagiti mannalon a sigurado a nababa ti kalidad dagitoy a taraknenda a pang-karne wenno pang-itlog.

Segun iti beterinario, naammuanna nga adda mailaklako a piek a Sasso iti P10.00 idinto a P35-40 ti agtartaray a presio dagiti nasayaat ti kalidadda a Sasso a piek.

Kinuna ni Bragado a saan a rekomendado ti opisinada a matarakenda gapu ta second generation dagitoy ket nababa ti kalidadda ken nalakada a kapten iti sakit.

Naammuan iti beterinario a mailasin dagiti nasayaat ti kalidadda a piek a Sasso agsipud ta uniform ti kolorda, saan a kas dagiti mailaklako iti nalaka a presio nga aglalaok ti kolorda, adda nangisit, adda puraw.

Inyunay-unay ni Bragado nga agpatingga laeng iti S-1 ti panag-breed iti Sasso.

“No ag-breedka out of S-1, saan a napintas ti pagbanaganna,” kinuna ni Bragado idinto nga innayonna a second generation daytoy ket saan a pangkarne wenno pang-itlog.

Kanaig daytoy, impakaammo ni Bragado a maangay ti Ilocos Sur Superchicken Congress inton Abril 30 babaen ti initiatibo ni Gov. Deogracias Victor Savellano.

“Maangay daytoy a Congress tapno maibaga dagiti mannalon no ania dagiti problemada mainaig iti pannakapatanor ti Sasso,” kinuna lni Bragado.

Segun iti provincial veterinarian, addanto pay dagiti mannalon a mangisalaysay iti panagballigida iti panagtaraknan iti Sasso a manok.

Inrusat ti provincial government ti panagtaraknan iti manok a Sasso kas sungbat iti problema ti kinakurapay ken malnutrision.#