BANNER NEWS: Rollback ti presio ti karne ti baboy, panggep ti Konseho ti Sinait a maipakat

SINAIT, Ilocos Sur – Adda tignay ti sangguniang bayan ditoy a maisubli ti presio ti karne ti baboy a mailaklako iti tiendaan publiko ditoy.

Iti pannakiuman ni Salvador Tambua, reporter ti DWRS ken ni Vice Mayor Edgar Yabes, kinuna daytoy a panggepda a mitingen dagiti meat vendors tapno maisubli ti presio ti karne ti baboy iti P160 kada kilo kalpasan ti pannakaangay ti Garlic Festival, tinawen nga aktibidad ditoy nga ili kas paset ti pannakarambak ti panagpiestana.

Naammuan iti bise mayor a naipangato ti presio ti karne ti baboy ditoy nga ili babaen ti berbal a kiddaw dagiti aglaklako iti baboy gapu iti kinakisang dagiti magatang a baboy.

Innayon ni Yabes a nagsublin ti normal a suplay ti baboy ditoy nga ili ket awanen ti rason a di maipakat ti rollback ti presio dagiti karne ti baboy a mailaklako iti tiendaan publiko ditoy.

Immun-una ngem daytoy, inyebkas ni Konsehal Emmanuel Agdeppa bayat ti maysa a session ti konseho  ditoy ti amakna iti yaadu dagiti maiserserrek a baboy ditoy nga ili manipud iti Bulacan amangan no adda sakit dagitoy.

Ngem impatalged ti municipal agriculturist ken ti bise mayor a naglasat dagiti baboy iti quarantine sakbay a maiserrekda iti probinsia ken ditoy nga ili.

Itay nabiit, sumagmamano nga ili iti Bulacan ken Pangasinan ti naireport a kinaptan iti sakit nga Eston Ebola virus dagiti tarakenda a baboy.#