BANNER NEWS: Task Force kontra swine flu, nabuangay

VIGAN CITY – Maysa a task force ti binuangay ti gobierno ti siudad para iti pannakalapped ti iseserrek ti A H1N1 virus ditoy.

Kinuna ni Mayor Eva Marie S. Medina a kasapulan ti panagtignay ti gobierno ti siudad nga idauluanna tapno malapdan ti posible nga iseserrek ti A H1N1 wenno swine flu virus ditoy siudad.

Idauluan nga agpadpada da City Health Officer Loida Ranchez ken City Veterinarian Liborio Arca ti nasao a task force a kangrunaan nga annongenna ti pannakamonitor ken pannakasiput dagiti sangsangaili ditoy siudad, nangruna dagiti ganggannaet a bisita ken kasangsangpet nga overseas Filipino workers.

Naipaannong met ken ni Arca ti pannakasiput dagiti dingnguen a maiserrek iti siudad.

Iti maysa nga interbiona iti media, indagadag ti beterinario ditoy siudad ti pannakaipasdek ti quarantine checkpoint iti Bantay, Ilocos Sur tapno masigurado nga awan ti makastrek nga adda sakitna a dingnguen nangruna iti baboy.

Indagadag daytoy ni City Veterinarian Dr. Liborio Arca gapu iti mapapati a kaadda dagiti makalusot a baboy iti quarantine checkpoints iti Tagudin ken Sinait a saan a naglasat iti inspeksion.

Kinuna ni Ranchez a nakikoordinardan kadagiti otel ken restaurants ditoy siudad para iti pannakamonitor dagiti bisita ken turista a dumagas ken mangan kadagitoy nga establisimiento.

Innayonna a nainget met a maipakat dagiti health measures iti Mindoro airport.

Imminget ti inspeksion ti opisina nga idadauluan ni Arca kadagiti maparparti a baboy ditoy siudad gapu iti mapapati a kaadda dagiti makalusot a baboy kadagiti quarantine checkpoints iti Tagudin ken Sinait.

Kabayatanna, nailista ti pagilian a maysan kadagiti nakastrekanen ti A H1N1 kalpasan a nagpositibo iti nasao a sakit ti maysa nga agtawen iti sangapulo nga ubing a naggapu iti Estados Unidos ken Canada, dua a pagilian a nakaduktalanen iti swine flu virus.

Nupay kasta, iti kaudian a damag, limmaingen ti nasao nga ubing.

Maysa a sakit a respiratory dagiti baboy a pinataud iti inpeksion ti swine influenza A virus (SIV) a makaapektar iti tao ti A H1N1.

Kapadpad ti simtoma ti swine flu iti sakit a patauden ti influenza virus kas iti panaggurigor ken panaglammin, panaguyek, nasakit a karabukob ken panagkapsut. Kadagiti dadduma a pasiente, makariknada iti pannakaulaw, panagsarua ken panagtakki.#