BANNER NEWS: Tripartite conference: agparpartuat iti sigarilio, P2 laeng kayatda maituon iti floor price ti tabako

VIGAN CITY – Kasungani iti ninamnama dagiti mannalon, sangkatipping laeng ti nagpatinggaan dagiti agparpartuat iti sigarilio iti kiddawda a maituon iti floor price ti tabako para iti masungad a tobacco season.

Iti naisayangkat a tobacco tripartite consultative meeting iti nagbaetan dagiti tobacco farmers ken dagiti tobacco manufacturers a naangay iti provincial capitol idi Septiembre 30, P2 laeng ti nagpatinggaan ti naud-udi a maituon iti floor price ti tabako a Birhinia iti masungad a panagtatabako, adayo a nababba nga amang ngem iti P19.84 a kiniddaw dagiti agmulmula iti tabako a pakaingatuan ti floor price manipud iti P61 a napagnunummuanan idi 2007.

Dismayado ni Bernard Vicente, dadaulo dagiti agmulmula iti tabako iti Sinait, Ilocos Sur ken napusgan a mangibagi kadagiti mannalon, iti nagtungpalan ti tripartite meeting.

Kinuna ni Vicente a no saan a mapatgan ti naudi a tawarda, amangan no adu a mannalon ti saanen nga agmula pay itoy a traditional crop ti Kailokuan.

Maysa nga aldaw sakbay ti tripartite conference, nagtataripnong dagiti mannalon manipud iti Ilocos Norte, Ilocos Sur, Abra ken La Union tapno maaddaanda iti maymaysa a komputasion nga idatagda iti tripartite meeting.

Iti komputasion dagiti mannalon, umabot iti P114,040.40 ti gastosda iti tunggal ektaria a pakaibilangan ti P47,286.40 manipud iti pannakaisagana ti seedbed, agduduma nga aramid iti talon ken panagpugon, P58,576.85 iti panangdan (labor), ken P8,176.88 para iti dadduma pay a gastos kas iti pannakatarimaan dagiti mausar a farm equipment ken pugon.

Pinatongan dagiti mannalon iti P18,956.96 a katukad ti 25% mark-up tapno umabot iti P132,997.09 ti kasapulan a paglakuan iti tunggal ektaria tapno makaganansiada.

Indatag dagiti mannalon ti P19.84 a pakaingatuan ti floor price ti tabako manipud iti P61 a napatgan idi 2007 tapno agbalin a P80.84 ti presio ti AA; P78.84 ti A; P76.84 ti B; P74.84 ti C; P69.84 ti D; P68.84 ti E; P63.84 ti F1.

Ngem kinuna dagiti agparpartuat iti sigarilio a dakkel unay ti paggidiatan ti kontar dagiti mannalon iti gastos iti panangdan, ganagan ken pestisidio no maikumpara iti komputasionda ket nagpatinggada laeng iti P2 iti maituon iti floor price ti tabako nupay idi agangay ket imbaba dagiti mannalon ti kiddawda iti P10.

Gapu iti saan a panagkasurotan dagiti dua a partido, napagnunummuan a maangay ti sabali pay a kumperensia tapno makapagsinnabatda.

Tunggal dua a tawen a maisayangkat ti tripartite meeting iti nagbaetan dagiti tobacco farmers ken dagiti agparpartuat iti sigarilio tapno tulagenda ti masurot a floor price daytoy a produkto iti masungad a panagtatabako.

Iti umuna a gundaway, naangay ditoy probinsia ti tripartite meeting, saan a kas iti kallabes nga iti Manila ti nakaangayanna.#