BANNER NEWS: UNP Candon, maisina iti UNP-Vigan, mapagbalin nga state college

CANDON, Ilocos Sur – Maysa a gakat ti impila ni House Deputy Speaker Eric Singson iti Kamara a maisina ti ti University of Northern Philippines-Candon Branch iti UNP-Vigan tapno mapagbalin a maysa nga state college.

Iti panagsaritana iti sanguanan dagiti scholars nga estudiante, impakaammo ni Singson nga impilana ti nasao a gakat tapno mapadakkel ken mapasayaat daytoy a pagadalan.

Segun iti diputado, agbalinton ti UNP-Candon Branch a Northern Luzon Philippines State College.

“Kas maysa nga state college, maaddaanto daytoy iti bukod a budget,” kinunana pay ti House deputy speaker.

Nadakamat ti diputado a mangibagi iti segundo distrito a maysa kadagiti kangrunaan a gagem ti pannakaisina ti UNP Candon-Branch ti idadakkel ti bilang dagiti agbasa ditoy a pagadalan ken ti iyaaadu dagiti kurso a maitanggayana.

“A branch is always a branch,” kinuna ni Singson sana inlawlawag a kas maysa a sanga, awanan daytoy iti bukod a budget ken saan nga independiente.

Kinunana pay nga isu ti nangipagna kadagiti capital outlays tapno maipatakder dagiti school buildings ti UNP-Candon iti agdama.

Kinuna pay ti diputado a bimmaba ti enrolment ti UNP-Candon Branch ket “kayatna a sawen, there is something wrong…”

Kinuna pay ni Singson a kadagiti napalabas a tawen ket adda 2,000 a nag-enrol iti daytoy a pagadalan ngem iti daytoy a tawen, bimmaba iti 1,600.

Kinuna ni Singson a no bumaba pay ti enrolment iti 1,500, saanen a kualipikado nga nga agbalin nga state college… ket mapukawtayo daytoy a gundaway.”