BANNER NEWS: Vigan biomass power plant, maipasdek babaen ti built-operate-transfer agreement

VIGAN CITY – Nakita ti Pacific Ecology Inc. nga adda feasibility ti maipasdek ti biomass power plant ditoy siudad isu nga agpursigida a maituloy daytoy a proyekto, segun iti bise mayor ditoy.

Kinuna ni Vice Mayor Franz Ranches bayat ti programana a “Ti Konseho ti Vigan” iti DWRS na P250 milion ti mapattapatta a gastuen ti Pacific Ecology Inc. para iti pannakaipasdek ti biomass power plant nga awan ti busbosen ti gobierno ditoy siudad iti babaen ti build-operate-transfer (BOT) agreement.

Kinuna ni Ranches a panggep idi ti city government ti mangipasdek iti biomass power plant kas paset ti programa ti city government nga idauluan ni Mayor Eva Marie S. Medina nga agbalin daytoy a siudad a globally competitive ngem naitantan gapu iti kadakkel ti investment nangruna ket mautang iti bangko ti pangpondo iti pannakaipasdekna.

“All of a sudden, nangited ti Pacific Ecology iti proposal nga isuda ti mangigasto iti pannakaipasdek ti biomass power plant, manipud iti pannakaisayangkat ti feasibility study, konstruksion ken operasion iti babaen ti build-operate-transfer agreement,” kinuna ni Ranches.

Iti maysa nga interbiona iti media, kinuna ni Mayor Medina a saan laeng a mangipaay ti nasao a proyekto iti nalaklaka nga elektrisidad kadagiti agindeg ditoy siudad ken kadagiti kaparangetna a munisipalidad no di pay makatulong a mangsolbar iti problema ti global warming babaen ti pannakaaramat dagiti sabali a pagtaudan iti enerhia.

Innayon ni Ranches a doble ti panggep ti biomass power plant: kabayatan ti itutulongna iti pannakapabassit ti carbon emission a mangit-ited iti polusion iti tangatang a makagapu iti climate change, maprobitiar ti agricultural waste a source of fuel para iti planta.

“Nupay saan unay a dakkel…, adda kontribusion ti biomass power plant a mapalaka ken agbalin a competitive ti presio ti elektrisidad ken at the same time, adda kontribusion iti pannakapabassit ti carbon emissions,” kinuna ti bise mayor.

Segun ken ni Ranches, madama ti pannakarebio ti naaramid a resolusion santo ti pannakapirma iti build-operate-transfer agreement.#