Footer

BANNER NEWS: Wanted a kameng ti grupo a gun for hire, naaresto sadiay Apayao

FLORA, Apayaao – Maysa a kameng ti grupo a matangdanan a pumatay ti inaresto dagiti nagtitipon nga elemento ti kapolisan ditoy idi agsapa ti Abril 3.

Inaresto dagiti operatiba ti CIDG Ilocos Sur, PIB ken PIDMB ISPPO, Ilocos Sur PPSC, Sinait MPS, Laoag City PS, Apayao PPO ken Flora MPS ni Ruel T. Magbulos, 46, awanan asawa, sadiay Barangay Malabibit, ditoy nga ili idi agarup 4:00 ti agsapa ti nadakamat a petsa babaen ti bileg ti warrant of arrest nga inyisio ni Judge Raphiel F. Alzate ti RTC Branch 24, Cabugao, Ilocos Sur.

Akusado ni Magbulos iti panagsalungasing iti Section 5, Section 11, ken Section 12 ti RA 9165 ken iti Comelec Resolution 10015 wenno gun ban a naidocket babaen dagiti kaso a CC No. 3479-K, 3480-K ken 3485-K iti nasao a korte.

Awan ti nairekomenda a piansa ni Magbulos iti immuna a kaso idinto a makapagpiansa iti P200,000.00; P60,000.00 ken P80,000.00 kadagiti tallo pay a kasona.

Ad-adda pay a dimmagsen ti kaso ni Magbulos agsipud ta bayat ti pannakaarestona, nakakumpiska dagiti polis iti ikutna iti cal. 45 nga adda nakasulbong a magazine a nagkarga iti pito a bula.

Segun iti polis, kameng ni Magbulos iti Igne-Rosette Group, maysa a mapapati a gun for hire a grupo nga agiwaywayat iti ope3rasion iti probinsia ti Ilocos Sur ken Ilocos Norte.

Nakalista pay ni Magbulos a No. 3 Most Wanted Person iti Ilocos Sur. (Tawid News Team)