Footer

Biahe ti eroplano a Vigan-Manila mairugi iti Marso 19

VIGAN CITY – Impakaammo ni Gov. Deogracias Victor Savellano nga addanton biahe ti eroplano nga agrubbuat ditoy a siudad a mapan iti Manila a mairugi inton umay a bulan.
Naipakaammo daytoy bayat ti Summit on the Future of Tourism in Ilocos Sur nga inatenderan ti liga dagiti mayor, liga dagiti bise mayor ken dadduma pay nga LGU officials, dagiti kameng ti Philippine Chinese Chamber of Commerse, Academe, simbaan, NGOs, PNP, Tourism Officers, ISHORE, Media ken dagiti opisial ti probinsia ti Abra nga indauluan ni Gov. Eustaquio “Takit” Bersamin a naangay iti provincial capitol itay nabiit.
Segun iti gobernador, kalpasan ti panangikomitar ti gobierno probinsial a kabaelanna a paruaren dagiti kasapulan nga imbaskag ti Inter-Island Airlines, immanamong ti nasao a kompania a maaddaan iti rota iti eropuerto ditoy siudad.
Impakaammo ni Luc Helgen, chairman ti nadakamat nga airlines, a mangrugi inton Marso 19 ti umuna a biahe ti Inter-Island Airlines manipud ditoy a siudad a mapan iti Manila.
Kinuna ni Savellano a dakkel ti maaramidan ti kaadda ti rota ti eroplano ditoy tapno sumantak ti turismo iti probinsia aglalo iti pannakaitandudo daytoy kas tourism, culture, pilgrimage ken culinary destination iti Amianan.
“Idawatko ti kooperasion ti amin a sektor tapno makikaysada itoy nga addang ti gobierno probinsial. Suportarantayo koma daytoy,” kinuna ni Savellano.
Kabayatanna, kinuna ni Bersamin a no agtultuloy ti biahe ti nasao nga airline, mabenepisiaran met ti probinsia ti Abra iti benneg ti turismo ta as-asideg ti Vigan airport iti probinsiana no ikumpara iti Laoag Airport.
“Agyamanak iti panangiraman kadakami ni Gov. DV ket mangnamnamakami nga iti mabiit, makita metten dagiti turista ti progreso ti Abra a mangpunas iti negatibo nga imahe ti probinsia,” kinuna ti gobernador.
Iti inisial a rota, agbiahe ti Inter-Island Airlines manipud Manila iti alas kuatro ti malem ti Domingo ket agsubli iti 7:30 ti bigat ti Lunes. Tumayab met ti maikadua a biahe iti 4pm ti Huebes ket agsubli iti Manila iti 7:30 ti bigat ti Biernes.
Segun ken ni Helgen, P3,450 ti plete ti one way a biahe wenno P6,900 ti roundtrip.#