Biktima ti bagyo Lawin, naikkan tulong pinansial

CABUGAO, Ilocos Sur – Agarup 1,800 a biktima iti kallabes a bagyo ditoy nga ili ti naikkan iti tulong pinansial itay nabiit.

Naidalan iti lokal a gobierno ditoy ti nasao a tulong kadagiti umili ditoy a nadadaelan ti pagtaenganda (partial ken totally damaged) a namindua a beses nga imbunong ti Department of Social Welfare and Development iti munisipio.

Maipalagip nga idi Disiembre 10, 2016, agdagup iti 300 a resipiente ti immawat iti sag-P5,000.00.

Idi Disiembre 14, sabali pay a 750 resipiente a mismo nga inyawat dagiti pannakabagi ti DSWD Regional Office 1 babaen ti tulong ti MSWDO  ti isu met laeng a gatad a naited iti sango ti barangay hall ti Barangay Rizal babaen ti pannakipaset da SBM Danny Q. Gazmen, SBM Vicky S. Serna, SBM Dr. Jemaima S. Tan-Yee, SBM Atty. Randy B.G. Kinaud ken ni SBM Josefina S. Vallejo.

Kanaig daytoy, nagyaman ni Mayor Josh Edward S. Cobangbang iti DSWD gapu ta maudi ti Cabugao a pakaipapaayan iti cash assistance para kadagiti nadidigra iti Bagyo Lawin.

Innayon ni Cobangbang a pammaneknek daytoy ti nasayaat a panagkakammayet dagiti opisial ti gobierno lokal, ken ti MSWD nga idadauluan ni Gazmen.

Dinayaw pay ni Cobangbang dagiti empleado, department heads ken dagiti nabutosan nga opisial ti munisipio agsipud ta  ammoda a tuntonen ti sumangpet a pundo a direkta nga awaten dagiti resipiente.

Kas panangilawlawag ni MSWD Officer Lydia S. Gazmen iti pakabuklan ti Emergency Shelter Cash Assistance Project (ESCAP), naggapu ti pundo manipud iti nasional a gobierno ket naidalan iti rehional, probinsial ken munisipal a benneg tapno maisaranay kadagiti umili a biktima iti Bagyo Lawin, partikular dagiti nadadael ti pagtaenganda. (Manipud iti report ti Web-In-Action)