Bin-i a mani, agkurkurang

STA. LUCIA, Ilocos Sur – Agkurkurang ti bin-i a mani a maimula ditoy nga ili, daytoy ti naammuan ken ni Bise Mayor Estrella Hernaez itay nabiit.

Iti interbiona iti DZTP Radio Tirad Pass, kinuna ni Hernaez a dinawatnan iti asosasion dagiti agmulmula iti mani iti barangay Luba ti panagmulada iti ad-adu tapno dakdakkel ti produksion ken mapaadda iti pagkurangan a bin-i.

Inlawlawag ti bise mayor a kaadduanna a rummuar amin dagiti apit a mani a gatangen dagiti traders manipud iti Pangasinan, Manila ken dadduma pay a probinsia ket awan ti mabati a para bin-i.

Agkalkali pay laeng ni mannalon, gatangendan ti mani… no kuan awanen ti mabati,” kinuna ni Hernaez idinto nga indagadagna kadagiti agmulmula ti panangilasinda koma iti bin-ida para iti sumaruno a panagmumula.

Kinuna ti bise mayora nga adda inted ti Department of Labor and Employment (DOLE) a P500,000 kas tulong kadagiti agmulmula iti mani tapno dumakkel ti produksionda.

Ti mani ti one town one product (OTOP) daytoy nga ili ket nalataken dagiti produkto ditoy a kas iti peanut brittle, peanut butter, peanut polvoron ken dadduma pay a by-products ti mani.#