Bingay iti tobacco excise tax, equal sharing, kuna ti sangguniang bayan

SINAIT, Ilocos Sur Agpapada a bingay iti pondo manipud iti RA 7171 ti kayat dagiti barangay captains bayat ti dialogo a naangay iti nagbaetan ti opisina ti ehekutibo, sangguniang bayan ken dagiti pangulo dagiti nadumaduma a barangay ditoy itay nabiit.

Inangay ti ehekutibo babaen ti initiatibo ni Mayor Marlon Ines ti nasao a dialogo tapno tratarenda ti isyo maipanggep iti bingay dagiti nadumaduma a barangay ditoy nga ili.

Saan nga inanamongan ti sangguniang bayan ti pannakaiwaras ti umuna a release ti bingay ti munisipio lmanipud iti tobacco excise tax a P5.8 milion kadagiti 30 a barangay idinto nga awan ti bingay dagiti 14 a barangay a kaadduanna kadakuada ti kangrunaan nga agmulmula iti tabako.

Iti naangay a dialogo, kinuna ni  Ines a ti naudi a naruk-atan a pondo P1.5 milion a bingay ti ili manipud iti RA 7171 ti pagbibingayan dagiti 14 a barangay.

Ngem kinuna ni ABC President Glen Guzman nga equal sharing ti kayat dagiti saan a nawarasan a barangay iti bingay ti RA 7171.

Segun iti nasao nga opisial, pagtiponen ti umuna ken maikadua a release ti pondo manipud iti RA 7171 ket daytoy ti pagbibingayan dagiti 44 a barangay ditoy nga ili.

Sumagmamano met a kapitan ti barangay a first priority a nabingayan iti pondo ti RA 7171 ti nangibatad nga umanamongda nga uray maikkatan ti bingayda tapno marisuten ti problema.

Kabayatanna, kinuna ni Ines a no equal sharing ti mapag-aanamongan iti sangguniang bayan, respetarenna daytoy a desision tapno mayimplimentar metten dagiti proyekto a nakaisangratan dagiti pondo manipud iti RA 7171.#