Ceremonial burning ti droga iti Burnham Park, dinawat ti mayor a maisardeng

BAGUIO CITY – Dinawat ti mayor ditoy siudad kadagiti pannakabagi ti linteg ti panangisardengda iti publiko a panagpuor ken panangdadaelda kadagiti maiparparit nga agas a koberan ti media agsipud ta mangipapaay iti dakes nga imahe daytoy a siudad.

Kinuna ni Mayor Reinaldo A. Bautista a mangparparnuay iti madi nga impression iti siudad ti panagpuor ken panangdadael dagiti polis ken ahensia kontra droga kadagiti masamsamda a marihuana a masansan a maisayangkat iti Melvin Jones grandstand iti Burnham park.

Masansan nga isayangkat ti Philippine Dug Enforcement Agency (PDEA) Cordillera, ken dagiti polis ti pannakapuor dagiti makumpiskada a marihuana iti imatang dagiti residente ken turista ken iti coverage ti media.

Kinuna ti mayor a gapu iti masansan a panagpuor iti droga iti grandstand iti Burnham Park a koberan pay ti media, parnuayenna ti impression a ditoy siudad ti paggapgapuan dagitoy a mangperdi iti imahe ti Baguio City a kas maysa a drug-free a siudad.

Iti immun-una nga interbiona iti media, dinawat pay ni Bautista iti media a dida koma iladawan daytoy a siudad a nariribuk ken napeggad babaen dagiti padamagda.

Dinawat daytoy ti mayor iti sanguanan dagiti padamag kadagiti pagiwarnak, radio ken iti telebision dagiti kaso ti panagtakaw, panagrarambol dagiti agtutubo iti kalkalsada ti siudad ken panagsibbarut iti selpon ken nakabagsolan ti anak a balasang ti regional director ti Philippine Information Agency a napasamak laeng itay Abril 1 ken pannakadukot ti selpon ti maysa a prosecutor bayat ti pannagnana iti Session Road.

Kinuna ni Bautista nga isolated cases laeng dagiti napasamak idinto nga innayonna a natalged ken adda seguridad dagiti turista a mapan agpallailang iti Baguio City.#