Footer

Contingency plan para iti krisis, trinatar ti RDC

San Fernando City – Tapno sakbayan ti posible a pannakaapektar ti Rehion I iti krisis pinansial a sagsagabaen ti Estados Unidos ken dadduma pay a nabaknang a pagilian iti lubong, inangay ti Regional Development Council ti maysa a kumperensia iti St. Louis College ditoy itay Pebrero 11 tapno mangiwayatda iti contingency plan para iti rehion.

Impresentar ni National Economic Development Administration Regional Director Leonardo Quitos ti framework ti economic resiliency plan ti pagilian a mabalin nga adaptaren ti rehion.

Umuna ditoy ti pannakapreserba ken pannakapaadu ti trabaho a sumrekan dagiti umili, panangprotehir kadagiti poorest of the poor, OFWs ken mangmangged nga adda iti export industry, pannakasigurado ti nababa ken natibker a presio tapno masuportaran dagiti consumers ken pannakapasayaat ti “competitiveness” kas panagsagana iti global rebound.

Kuna dagiti ekonomista nga apektado ti export industry, turismo kasta metten ti garment ken electronic industry. Nupay kasta, adda met nasayaat a naipaay ti krisis sangalubongan. Daytoy ti panagbaba ti presio ti produkto petrolio a nakatulong met kadagiti adda iti industria ti transportasion.

Segun ken ni Quitos, mangiparuar ti national government iti P330 bilion para iti pannakapapigsa ti ekonomia ti pagilian.

Indagadagna a masapul a mapasayaat ti koleksion ti buis ken panangallukoy kadagiti export firms a pasayaatenda dagiti produktoda.

Mainaig itoy napagnunummuan ti RDC I nga idauluan ni Gob. DV Savellano nga ipromotda ti Region I kas nalaklaka a tourist, vacation, culture, leisure, sports ken adventure destination, mangisayangkatda iti training kadagiti agserserbi iti tourism- oriented establishments ken Comprehensive Livelihood Employment Program (CLEEP) babaen ti TESDA kas addang a pangsuporta iti programa ti national government.#