Crime solution efficiency ti PNP iti Ilocos Sur, ngimmato

VIGAN CITY – Ngimmato iti nasurok maysa a porsiento ti crime solution efficiency ti Ilocos Sur manipud Enero agingga iti Agosto 2009 no idilig iti kastoy met laeng a tiempo itay napan a tawen.

Iti naangay a Provincial Peace and Order Council meeting iti panangidaulo ni Gov. Deogracias Victor Savellano itay Setiembre 14, inreport ti PNP Ilocos Sur Police Provincial Office babaen ken ni Police Supt. Marlo Castillo a nagbalin nga 83.1% ti crime solution efficiency ita a tawen manipud iti 81.5% idi 2008.

Inreport pay ni Castillo nga iti pannakaipakat dagiti special laws, adda tallo nga insidente ti carnapping a nakatiliwan ti PNP iti lima a suspects ken tallo a matorsiklo. Iti met kampania kontra iti loose firearms, nakaisayangkatda iti 49 nga operasion a nakatiliwan ti 39 a suspects, 24 a high powered firearms, 12 a low powered firearms ken adda met 7 a low powered firearms a boluntario a naisuko.

Mainaig iti insurhensia, inreport ni Castillo nga adda 9 a barangay iti probinsia a makuna nga influenced barangay, 16 a less influenced ken 88 a threatened.

Iti kampania kontra illegal a droga, nakatiliw ti PNP iti 21 a drug user/pushers iti 17 nga operasion a nakasamsamanda iti shabu ken marihuana a mapattapatta nga aggatad iti P193,167,030 ken nakaipilaan iti 15 a kaso iti korte.

Kabayatanna, inlawlawag ni PNP Provincial Director Virgilio Fabros a maigapu iti saan a panagkikinnaawatan dagiti agkakaarruba ken agkakabarangayan ti kaaduan kadagiti napasamak a krimen ket awan ti aramid dagiti notorious organized groups.

Kinuna ni Fabros a generally peaceful ti Ilocos Sur ken maikatlo daytoy a katalnaan iti sibubukel a rehion.

Impakaammo ni Fabros a saanen a ti provincial director ti mangpili iti maipuesto ken mangrelibo iti chief of police ti maysa nga ili no di dumalan daytoy iti proseso iti Placement Board ti Rehion iti panangidaulo ti Deputy Regional Director for Administration. Kinuna ni Fabros a maisubli iti PD ti lima a mabalin a pagpilian a hepe ti polis ket dagitoy ti maidatag iti mayor.

Kinuna ni Fabros nga adda iti PD ti pangngeddeng no kaso administratibo ti pakarelibuan ti hepe ti polis.

Adtoy ti dadduma pay a linaon ti report ti PPO: Total Index Crime: 2008 – 146, 2009 – 193; Total Non Index Crime: 2008 – 169, 2009 – 115; Total Crime Volume: 2008 – 315, 2009 – 308; Total Crime Solved: 2008 – 257, 2009 – 256; Average Monthly Crime Rate: 2008 – 6.4, 2009 – 5.#