Footer

CSC examinations, maangayen iti Vigan City

VIGAN CITY- Ditoyen siudad ti pakaangayan ti Career Service Examination para iti professional ken sub-professional inton Nobiembre, daytoy ti inwaragawag ti hepe ti Civil Service Commission ditoy probinsia.

Kinuna ni CSC provincial officer Hedy Jose Lardizabal a pinatgan ti central office nga agbalin a testing center ti Vigan gapu ta “impakitami a kabaelantayo met nga angayen ti eksamen ditoy Vigan.”

“Nakitada ti importansiana (panagbalin a testing center ti Vigan City) ket maysa a “karit kadatayo ditoy Ilocos Sur,” kinuna ti CSC official.

Impakaammo ni Lardizabal a manipud iti tallo a testing centers a pakairamanan idi ti San Fernando, Laoag ken Lingayen, manipud itay Marso daytoy a tawen, nagbalinen a dua laeng ket malaksid iti San Fernando City a regular examination center, agsinnublaten ti provincial offices ti Lingayen, Laoag City ken Vigan City nga agbalin nga examination center.

Ti Lingayen ti testing center idi Hulio, ti Laoag idi Marso ken iti Vigan City inton Nobiembre, segun iti dadaulo ti CSC.

Kinuna ni Lardizabal a sumagmamano a kondision ti naidagadag sakbay a napagbalin a testing center ti Vigan City kas iti kaawan ti rummuar wenno mapataud nga anomalia iti panageksamen, kaadda iti seguridad dagiti examination materials, kabaelan dagiti personnel a mangangay iti eksamen a pakaemployan dagiti mangisursuro.

Kinuna pay ni Lardizabal nga awanen ti quota dagiti ageksamen, makabulan ti cut-off date a panagipila iti aplikasion kasta met nga awanen ti requirement ti educational attainment.#