Daan a bank notes, dinton maisukat mangrugi Enero 1, 2017

Impalagip ti Bangko Sentral ng Pilipinas (BSP) nga agpatingga laengen inton agtapus ti Disiembre iti daytoy a tawen a maipasukat dagiti daan a bank notes (new design series) nga adda iti ikutda.

Segun iti BSP, manipud iti Enero 1, 2017, awanton ti balor dagiti NDS bank notes ket dagiti laengen agdama a banknotes wenno ti New Generation Currency (NGC) series a nailunsad idi Disiembre 2019 ti maaramat.

Segun ken ni BSP-La Union Director Ruel Joseph Del Rosario, addaan ti NGC bank notes kadagiti napasayaat a security features tapno nalaka a mailasin dagiti consumers dagiti pudno a kuarta kadagiti peke a bank notes kas iti embossed prints, serial numbers, nalabaga ken asul a security fibers ken watermark ti anniniwan nga imahe ti nailadawan ken ti langa ti numero iti blangko nga espasio no maisarang ti kuarta iti lawag.

Innayon ni Del Rosario nga ub-ubing ti langa dagiti bannuar ken presidente ken nalatak ken pagsidsiddawan a natural a lugar iti pagilian a naimarka iti agdama a kuarta.

Dagitoy dagiti kangrunaan a features dagiti agdama a papel a kuarta: iti P20 bill – ni dati a Presidente Manuel L. Quezon,  ti Banaue Rice Terraces, Palm Civet ken Cordilleran indigenous weave design; iti P50 – ni dati a Presidente Sergio Osmeña, ti Taal Lake, Maliputo ken embroidery design manipud iti probinsia ti Batangas; iti P100  – ni dati a Presidente Manuel A. Roxas, Mayon Volcano, whale shark ken indigenous textile design manipud iti Bicol region; iti P200 – ni Presidente Diosdado P. Macapagal, ti EDSA People Power II, Bohol Chocolate Hills, tarsier ken indigenous weave design manipud iti Visayas; iti P500 – ni dati a Presidente Corazon C. Aquino ken dati a Senador Benigno S. Aquino Jr., Puerto Princesa, Subterranean River National Park, blue-naped parrot ken indigenous weave design manipud iti Southern Philippines; ken iti P1,000 – da  Josefa Llanes Escoda, Jose Abad Santos ken Vicente Lim, Tubbataha Reefs Natural Park, South Sea Pearl ken dyed abaca a nalaga manipud iti Mindanao.

Pinalagipan pay ni Del Rosario ti publiko ti panagsukisokda kadagiti husto ken kredible a sources tapno saanda a mabiktima kadagiti manglokloko.#