Dadakkel a premio dagiti mangabak iti nadumaduma a pasalip

SAN ILDEFONSO, Ilocos Sur – Dadakkel dagiti premio nga agur-uray kadagiti makisalip kadagiti nadumaduma a kumpetision iti panangselebrar daytoy nga ili ti panagpiestana iti Septiembre 16-18, 2009.

Kinuna ni Mayor Christian Purisima a dadakkel ti premio nga iyawid dagiti mangabak iti pasalip iti native chicken adobo, burnay painting, barbecue revolt, Battle of the Bands ken ti streetdancing competition kas tampok nga aktibidad iti panangselebrar ti ilina iti panagpiestana.

Naammuan iti mayor a kalpasan ti flag ceremony iti municipal plaza, maangay ti misa iti daan a Gongogong bridge santo ti pannakabendision dagiti dua a babbaro a rangtay ti San Ildefonso.

Maangay ti pangngaldaw iti rangtay babaen ti “Kinnammet” wenno boodle fight a ti chicken adobo ti kangrunaan a maidasar a taraon para kadagiti sangsangaili, dagiti opisial iti probinsia, munisipal ken barangay ken dagiti agindeg.

Iti alas tres, maangay ti Open Invitational Streetdancing Competition and Showdown nga umawatan ti mangabak iti umuna a gunggona iti P50,000, 2nd – P25,000, 3rd – P10,000, ken P5,000 a consolation prize kadagiti amin a nakisalip. Ti tema ti pasalip: “Basi, Unas ken Panagdapil”.

Dagiti sumaganad dagiti dadduma pay a pasalip ken ti premio dagiti mangabak: Native Chicken Adobo: 1st Prize – P5,000, 2nd – P3,000, 3rd – P2,000; Burnay Painting Contest: 1st Prize – P5,000, 2nd Prize – P3,000, 3rd Prize – P2,000; Barbecue Revolt: 1st prize – P10,000, 2nd – P5,000, 3rd – P3,000, 4th – P2,000, 5th – P1,000, 6th – P500; ken Battle of the Bands: 1st Prize – P20,000, 2nd – P10,000, 3rd – P5,000, 4th – P3,000, 5th – P2,000, 6th – P1,000, 7th – P500.

Segun iti mayor, duapulo ket liman a banda ti nakapalista a makisalip.#