Damag a nasarakan iti pagmikianna sangasako nga ulo ti pusa, saan a pudno, kuna ti akinkukua

VIGAN CITY – Makasangsangit nga imbatad ti maysa a babai nga agnegnegosio iti miki nga awan ti kinapudnona ti agwarwaras a damag a maysa a reid ti insayangkat dagiti polis ditoy siudad ket mapapati a nakasukalda iti sangasako nga ulo ti pusa iti paglutlutuanda.

Kinuna ni Marina Habab, mangimatmaton iti Christian Store, panganan iti miki a masarakan iti Barangay 3, nga awan ti kinaagpaysona ti damag idinto nga impeksana iti sakit ti nakemna iti pannakapadpadakesna.

“Yamanek ti yaaymo, sir… ta nabayagen a kayatko a malawlawagan daytoy maipadpadamag maikontra kadakami,” makasangsangit nga imbalikas ni Habab ken ni Peter Rebunal, reporter ti DWRS, a naipatangatang iti programa ni Jun Ramos a Barangay CommandoBrigada itay Mayo 23.

Mapapati a naipatangatang ti nasao a damag iti maysa a radio station (saan a ti DWRS).

Nupay kasta, saan nga imbaga ni Habab ti nagan ti anaunser ken ti radio station.

Segun ken ni Habab, napanda payen iti City Health Office tapno madalusan ti naganda mainaig iti agwarwaras a damag a sangasako nga ulo ti pusa ti nasarakan iti pagpakpakananda iti miki.

Innayonna a napanda pay inammo iti police station ditoy siudad no agpayso nga adda reid nga insayangkatda iti paglaklakuanda iti miki ngem imbagada nga awan.

Segun ken ni Rebunal, naberipikana met iti polis nga awan ti inwayatda a reid iti nasao a paglakuan iti miki.

Kinuna ni Habab a dakkel ti epekto ti nasao a damag iti negosioda ta bimmassit ti malakuanda.

“Nupay kasta, agyamankami ta adu latta ti saan a mamati iti damag ket no umayda latta mangan ditoy,” kinunana ni Habab.

Idi sinaludsod ni Ramos no apay nga isu ti puntiria a padpadaksen, insungbat ni Habab a “mabalin nga adda dagiti umapal kadakuada gapu ta isuda laengen ti agmikmiki iti Barangay 3.

Kinuna ni Habab a dida maaramid ti maipadpadamag maikontra kadakuada.

“Saanmi a mabalin a dadaelen ti kakaisuna a pagtataudan ti pagbiagmi…” makasangsangit a kinuna ni Habab.#