Dati a kaso ti pammaltog kitkitaen dagiti polis a motibo iti Madriaga killing

BANTAY, Ilocos Sur- Adda standing warrant of arrest ti suspetsa iti pammapatay iti Barangay Cabusligan ditoy nga ili idi rabii ti Nobiembre 17 ket daytoy ti anggulo a kitkitaen dagiti polis a motibo iti krimen.

Iti interbiona iti DWRS, kinuna ni Deputy Chief of Police Andrew Rabang nga adda standing warrant of arrest ni Paciano Madriaga, ti suspetsa a mapapati a nangserrek iti pagtaengan dagiti agassawa nga Arcadio ken Rosalina Madriaga iti Barangay Cabusligan ditoy sana pinarakapak dagiti agassawa.

Segun ken ni Rabang, sumangsango ti suspetsa iti kaso a frustrated homicide gapu iti mapapati a panangpaltogna ken ni Arcadio. Nakalasat ni Arcadio ket insaklang ni Rosalina ti kayongna iti korte gapu iti nasao a pammaltog.

Idi alas otso ti rabii ti Nobiembre 17, mapapati a sinerrek ti suspetsa ti balay dagiti agassawa ket pinarakapakna ida babaen ti M-16 armalite rifle.

Dagus a natay ni Rosalina. Nagsagrap ti sugat ni Arcadio ti makannawan nga imana.

Nakarekobre dagiti imbestigador iti 26 a kapsula manipud iti M-16 armalite rifle iti nakapasamakan ti krimen.

Kinuna ni Rabang a nagpukaw ni Paciano iti barangayda kalpasan ti pannakaipaulog ti warrant of arrest.

Agtultuloy ti panagpalutpot dagiti polis mainaig iti nasao a pammaltog.#