Dati a US Navy, umuna kadagiti napadayawan iti salip ti ISAH Green Revolution 2009

HAWAII – Maysa a dati a kameng ti US Navy ti nangiyalat iti kangrunaan a gunggona iti salip iti Green Revolution nga inesponsoran ti Ilocos Surian Association of Hawaii (ISAH).

Nagkaykaysa dagiti kameng ti hurado a nangited iti major prize iti kategoria ti backyard vegetable ken ni Jose Lived, tubo ti Sinait, Ilocos Sur ngem agnaeden iti Aiea, Hawaii gapu kadagiti mulana aglawlaw ti pagtaenganda a pakairamanan ti paria, tarong, kamatis, papaya, daligan, mangga, abokado, sili, saluyot, pias, ken dadduma pay a nateng ken agbunga a kayo.

Immawat met iti major prize ni Dr. Elizabeth Abinsay iti Ornamental and Landscaping Category, ni Art Abinsay iti Vegetable, Backyard Category, consolation prize, ken Leonora Dumlao ken Emelita Soria, Ornamental and Landscaping, consolation prizes.

Inawat ni Lived ti gunggonana a cash money ken Certificate of Recognition kabayatan ti binulan a regular a miting ti Hunta Direktiba ti ISAH a naangay idi Nobiembre 3, 2009 iti SusannahWesley Community Center a dinar-arayan dagiti dadduma a pannakabagi ti unit organization iti linong ti ISAH.

“Uray rengngat ti hollow tile, iti baet ti retaining wall, ikkak iti bukbukel, ket no agtubodan, asintarak metten a taraknen ida, ikkak idan iti pagkalatkatanda,” kinuna ni Lived idinto nga innayonna a nagbalinen daytoy a paglinglingayanna no malpasen ti trabahona.

Maysa a cook ni Joe iti Pearl Harbor. Ni Natividad Ipalari Lived, maysa a realtor, ti kaingungotna. Kamengda iti Annak Ti Sinait Iti Hawaii ken iti Sinait National High School Alumni Association of Hawaii.

Nangrugi ti salip idi Enero 2009 ket naggibus idi Septiembre 2009. Dagiti laeng kameng ti ISAH ti mabalin a makisalip iti daytoy a pilot project ti gunglo tapno mapreserba ti ugali ken kannawidan ni Ilokano iti panagmulmulana iti arubayan.

Kabayatanna, impatalged ni Danny Villaruz, presidente ti ISAH, a no agballigi daytoy a proyekto iti Green Revolution, maaramid a maysa kadagiti sumagmamano a gannuat ti ISAH.

“Malaksid iti Medical Homecoming Mission iti kada dua a tawen, aramidentayo daytoy tapno matungpal ti panggep ti ISAH a “rebuilding strong and healthy communities in Hawaii and at home,” kinuna ni Villaruz.

Ni Antonio Ipalari, presidente ti Annak ti Sinait iti Hawaii, ken assistant auditor ti ISAH, ti pangulo ti komite a nangtarawidwid iti nasao a pasalip.

Kadua ni Ipalari da Amado Yoro, Gus Concepcion, Rogelio Idica, Philip Alcain, Al Sabangan, Ador Quijano.

Nagpaay a kameng ti hurado da Mrs. ISAH Davelyn Quijano, Rosebella Ipalari, Angelita Idica.#